بەڕێوەبەری گشتیی ئۆفیسی سلێمانی کۆمیسیۆنی باڵای سەربەخۆی هەڵبژاردنەکانی عێراق ئاشکرایدەکات هەر کاندیدێک بانگەشەى پێشوەختە دەستپێبکات سزا دەدرێت تا دورخستنەوەى، داواش دەکات هاوڵاتییان پەلە بکەن لە وەرگرتنەوەى کارتى بایۆمەترى دەنگدان.

هەواڵ:KNNC

ئامانج عەزیز،بەڕێوەبەری گشتیی ئۆفیسی سلێمانی کۆمیسیۆنی باڵای سەربەخۆی هەڵبژاردنەکانی عێراق بە کەى ئێن ئێنى راگەیاند؛ زیاتر لە ملیۆنێک هاوڵاتیی کە مافى دەنگدانیان هەیە کارتى بایۆمەتریان وەرگرتوەتەوە و رۆژانەش پرۆسەى دابەشکردنەکەى بەردەوام دەبێت تا 19/10/2024.

جەختیکردەوە  کە کارتى بایۆمەترى لەبەر ئەوەى پەنجەمۆر و وێنەى کەسەکەى لەسەرە، تەنها خاوەنەکەى دەتوانێت بەکاریبهێنێت و وتى: گرنگە هاوڵاتییان بێن و کارتەکانیان وەربگرنەوە تا بەشدارى پرۆسەى دەنگدان بکەن.

لەبارەى ئەو کاندید و حیزبانەى دەستیان بە بانگەشەى هەڵبژاردن کردوە بەڕێوەبەری گشتیی ئۆفیسی سلێمانی کۆمیسیۆنی باڵای سەربەخۆی هەڵبژاردنەکانی عێراق وتى: لەڕێی لیژنەیەکەوە رۆژانە راپۆرت تۆمار دەکەن و ئەو کاندید و لایەنانەى بانگەشەى پێشوەختیان دەستپێکردوە رێکارى یاساییان بەرامبەر دەگیرێتەبەر.

ئەوەشى ئاشکرا کرد کە سزاى ئەو کاندیدانەى بانگەشەیان دەستپێکردوە پێبژاردن تا دورخستنەوەیەتى لە کاندیدبون.