ئەمڕۆ ماڵى ئیمامى جومعەى نەجەف بە ئامانجگیرا و راستەوخۆ دواى روداوەکەش موقتەدا سەدر سەردانى کرد و رایگەیاند؛ هەر عێراقییەک چەک دژى عێراقییەکان هەڵبگرێت لە ئێمە بێبەرییە  و لە ریزەکانمان دەریدەکەین.

هەواڵ:KNNC

ئەمڕۆ چوارشەممە، لە نەجەف ماڵى سەدرەدین قەبانجى، ئیمام جومعەى نەجەف بە چەکى جۆرى ئاڕ پى جى بەئامانجگیرا و یەکێک لە پاسەوانەکانى کوژران، دواى هێرشەکە ئەوە بڵاوکرایەوە کە لایەنگرانى سەدر ئەو هێرشەیان ئەنجامداوە، هەربۆیە موقتەدا سەدر، رێبەرى رەوتى سەدر سەردانى ماڵەکەى کرد و دواتریش لەوبارەیەوە بەیاننامەیەکى لە تۆڕى کۆمەڵایەتیی ئێکس بڵاوکردەوە.

ساڵح محەمەد عێراقى  نزیک لە موقتەدا سەدر لە ئێکس نوسیویەتى:"هەمو ئەو عێراقییانەى چەک دژى عێراقییەکان بەکاردەهێنن، ئەوا فیشەکەکەى دەنێن بە سنگى منەوە، منیش تا رۆژى قیامەت لێیان بێبەریم و لە بنەماڵەى سەدر و بزوتنەوەى نەتەوەیی شیعە دەردەکرێت.

هەروەک نوسیویشیەتى:" هەرکەس ئێمە و عێراقى خۆش دەوێت ناسنامەى ئەو کەسانەمان بداتێ کە چەک بەکاردەهێنن ئەگەر نا بە یەکێک لە هاوکارەکانیان دادەنرێن و دەبنە دوژمنى ئێمەش و عێراقیش.