سەرەڕای گرانی خواردن، بەرزبونەوەی نرخی هەموشتێک، بەڵام لە چێشتخانەکەی "أم شوقى" هیچ باسێک لە گرانی نییە.

 لێرە، قاپێک برنج و فاسۆلیا لەگەڵ قاپێک زەڵاتە بە هەزار دینارە

ڕەنگە ئەمە هەرزانترین چێشتخانەبێت لە عێراقدا

لە نێو بازاری " سوق الغزل" و شاری نێوان دو ڕوباردا، لە کۆڵانە تەنگ و باریکەکانی ئەو شارەدا، دو دڵی میهرەبان هەن، ناهێڵن کرێکار و کەمدەرامەتەکانی ئەو شارە برسیبن.

دایکی شەوقی خۆی و کچە تاقانەکەی، زیاتر لە 30 ساڵە لە گەڕەکێکی تەنگ و باریکدا، لە نێو خانویەکی خنجیلانەی زۆر قەدیمدا، یەکێك لە ژورەکانیان کردوە بە چێشتخانە و ڕێگەی هەژار و کاسب و کەمدرامەتەکان.

پەنجەرەیەک بۆ تێربونی سکە برسییەکان

 لێرە لە پەنجەرە بچوکەکەی ماڵەکەیانەوە، ئەوانەی سەردانی چێشتخانەکە دەکەن، بەتەنها هەزار دینار، قاپی برنج و فاسۆلیا یاخود هەر شلەیەکی دیکە بێت، وەری دەگرن، لەگەڵ سەمون و قاپێک زەڵاتەشدا، هەر لە کۆڵانە باریکەکەدا لەسەر ئەو کورسى و مێزانەی بۆیان دانراوە، بە برسێتی دادەنیشن و بە تێری هەڵدەستن.

خواردنگەکە سکە برسییەکان تێردەکات، بەڵام ئازاری خۆیان کەم ناکات

دایکی شەوقی بەمشێوەیە چیرۆکى ژیانى بۆ کەی ئێن ئێن گێڕایەوە و وتى: کەسیان نییە، تەنها خۆی و کچەکەین و پێکەوە دەژین، نەخۆشە و ناتوانێت ڕێبکات، سەرەڕای سەختییەکانی ژیانیان، هەمو هیوای لەسەر کچەکەیەتی، لەگەڵ ئەو چێشتخانە بچوکە، کە بەهۆیەوە دەتوانن دڵی هەژارەکان خۆشکەن و تاڕادەیەکیش بژێوی خۆیانی لێوە بەدەست بهێنن.

ئەوان ویستیان بو وێنەیان دەرنەکەوێت، ئێمەش وەک رێزێک بۆ ویستەکەیان وێنەی خۆیانمان نەگرت و بەڵێنمان پێدان بەبێ پیشاندانی خۆیان، چیرۆکەکەیان بگێڕێنەوە.

ئامادەکردن؛ بڵند عەبدولکەریم