ژنێکی تەمەن 92 ساڵ کە خەڵکی شاری ئۆلستۆنە لە بەریتانیا،37 ساڵە هەمو رۆژانێکی پێنجشەممە دەچێتە چێشتخانەیەک، هەمان خواردن دەخوات و نازناوی دڵسۆترین موشتەرییان لێناوە.

هەمەڕەنگ:KNNC

بی بی سی بەریتانی بەم شێوەیە چیرۆکی مۆلی ڕۆبنسنی بڵاوکردوەتەوە، کە لە ساڵی 1987 وە هەمو  پێنجشەممەیەک خاتونە تەمەن 92 ساڵەکە، نیو کاتژمێر بە تاکسی ڕێگە دەبڕێت و دەچێتە چێشتخانەی قەڵای لانگلی لە شاری نۆرسەمبەرلاند بۆ ئەوەی نانی نیوەڕۆی بخوات.

مشتەرییە دڵسۆزەکە، بۆ یەکەمجار لەگەڵ هاوسەرەکەی هاتوەتە چێشتخانەکە، لەو کاتەوە بوە بە مشتەرییەکی هەمیشەیی و تەنانەت دوای مردنی هاوسەرەکەشی هەر بەردەوامە لە سەردانیکردنی چێشتخانەکە.

ئەوەی جێی سەرنجە، ئەم خاتونە تەمەن 92 ساڵە، هیچ کاتێک خواردنەکانی نەگۆریوە و بەردەوام داواکارییەکانی  شۆربا، ماسی و چپس لەگەڵ دوو پەرداخ شامپانیا بون.

ئەمە جگەلەوەی بەردەوام لەگەڵ داواکارییەکانی خۆی، پەرداخێک شەمپانیا بۆ کارمەندانی چێشتخانەکە داوا دەکات تاوەکو بەیەکە و دابنیشن و گفتۆگۆ بکەن.

کارمەندانی چێشتخانەکە لەبارەی مشتەریەکەیانەوە دەڵێن، ئەو میوانێکی تایبەتە لای ئەوان و لەو کاتەوەی بوە بە مشتەری چێشتخانەکەیان، پێنج بەڕێوەبەر گۆردراوە و بە درێژای ئەو هەمو ساڵە بوەتە هاوڕێی نزیکی هەموان