لە کالیفۆرنیاى ئەمەریکا مامۆستایەک بە گازى شەمشەمەکوێرەیەک گیانى لەدەستداوە و بەپێی لێکۆڵینەوەکانیش ئەو شەمشەمەکوێرەیە هەڵگر و توشبوى نەخۆشى هاریی سەگ بوە.

هەمەڕەنگ:KNNC

میدیاکانى ئەمەریکا دواى گیانلەدەستدانى مامۆستا 22 ساڵەکە بڵاویانکردوەتەوە؛ بەرپرسانى تەندروستى گشتى ئەمەریکا هۆشداریانداوە لە مەترسیەکانى شەمشەمەکوێرە کە سەرچاوەیەکى بەربڵاوى گواستنەوەى نەخۆشى هارى سەگە بۆ مرۆڤ لە وڵاتەکە و نەخۆشییەکەش ئەگەر بەخێرایی چارەسەر نەکرێت دەبێتەهۆى مردن.

هاوڕێیەکى ئەو مامۆستا ئەمەریکییە باسى لە روداوەکە کردوە و وتویەتى:" لەکاتێکدا لە پۆلەکەیدا سەرقاڵى وانەوتنەوەبوە مامۆستاکە شەمشەمەکوێرەیەکى بینیوە و لەوکاتەدا کە ویستویەتى بیکاتە دەرەوەى پۆلەکە گازى لێگرتوە".

ئەوەشى وتوە کە راستەوخۆ مامۆستاکە نیشانەکانى نەخۆشى هارى سەگى تێدا دەرنەکەوتوە، بەڵکو دواى چەند هەفتەیەک نەخۆشکەوتوە و کاتێکیش براوەتە نەخۆشخانە توشى کۆما بوە و دواتر گیانى لەدەستداوە.

لە بەیاننامەیەکیشدا کە دواى گیانلەدەستدانى مامۆستاکە بڵاویانکردوەتەوە؛ قوتابخانەکە ئاماژەى بۆ ئەوەکردوە کە کاردەکەن بۆ بڵاوکردنەوەى هۆشیارى زیاتر لەبارەى ژیانى ئاژەڵانى کێوى و مامەڵەى مرۆڤ لەگەڵیان چونکە ئەوە کارێکى مەترسیدارە.