سەرۆكی هەڵبژێردراوی ئەمریكا هەڕەشە دەكات و هۆشداری دەدات لەدەرەنجامی خراپ ئەگەر بارمتە ئیسرائیلییەکان ئازاد نەكرێن تاوەكو دەستبەكاربونی، دەڵێت ئەگەر ئازاد نەكرێن دۆزەخیان نیشان دەدات.

هەواڵ:KNNC

دۆناڵد ترەمپ لە تروس سۆشیال، بڵاویكردەوە گروپە چەكدارە فەڵەستینیەكانی غەززە باجێكی زۆر دەدەن ئەگەر بارمتە ئیسرائیلییەکان ئازاد نەكەن تا ئەو كاتەی لە20ی مانگی داهاتو وەك سەرۆكی ئەمریكا دەست بەكاردەبێت.

ترەمپ دەڵێت: ئەگەر بارمتەكانی غەززە ئازاد نەكرێن، ئەو باجەی لە ڕۆژهەڵاتی ناوەڕاست دەدرێت گەورە دەبێت و دۆزەخیان نیشان دەدات، جەختیكردەوە ئەو لایەنانەی بەرپرسن لەو تاوانە دژبەمرۆڤایەتیە گەورەترین زیانیان بەردەكەوێت، بۆیە داوایكرد بەخێرایى بارمتەكان ئازاد بكرێن.

ئەو هەڕەشانەی دۆناڵد ترەمپ، لەدوای شكستهێنانی هەوڵە دیپلۆماسیەكانی ئیدارەكەی جۆبادین دێت لە گەیشتنە ڕێكەوتن بۆ كۆتایی هاتنی جەنگی غەززە و ئازادكردنی ئەو بارمتانەی 14 مانگە دەستبەسەرن.