ئەمرۆ كۆبونەوەی ئاسایی پەرلەمانی عێراق بۆ دەنگدان لەسەر سێ پرۆژەیاسای جێی مشتومڕ و ناكۆكی بەڕێوەدەچێت، پێدەچێت بەیەك پاكێج هەر سێ پرۆژەیاساكە بخرێنە دەنگدانەوە.

هەواڵ:KNNC

بڕیارە ئەمڕۆ جارێكی تر پەرلەمانی عێراق كۆببێتەوە و كارنامەی كۆبونەوەكەش بریتیە لە دەنگدان لەسەر پرۆژە یاساكانی هەمواری باری كەسێتی و لێبوردنی گشتی و گێڕانەوەی موڵكە داگیركراوەكانی سەردەمی بەعس.

لەكۆبونەوەی دوێنێی پەرلەمانی عێراق كۆی مادەكانی هەر سێ پڕۆژەیاساكە دەنگیان لەسەر دراوە و تەنیا پڕۆژەیاساكان بەگشتی ماون دەنگیان لەسەر بدرێت، بەهۆی تێكچونی ڕێژەی یاسایی، كۆبونەوەكەی پەرلەمان دواخرا بۆ ئەمڕۆ سێ شەممە.

بەپێی زانیارییەكان، ئەو سێ پرۆژەیاسا جێ ناكۆكە پەیوەندیدارە بەهەر سێ پێكهاتەی شیعە و سوننە و كورد، هەربۆیە پێدەچێت هەر سێ پڕۆژەیاساكە پێكەوە بخرێنە دەنگدانەوە، بۆ ئەوەی هیچ پێكهاتەیەك بەتەنیا و بەبێ ئەوانی دیكە پڕۆژەیاساكەی تێنەپەڕێنێت.