ماوەی دوو رۆژە لە بەنزینخانەکانی هەولێر و دهۆک نرخی بەنزین هەرزان بوە، بەڵام لە سلێمانی نرخەکەی بە بەرزی ماوەتەوە.

هەواڵ:KNNC

پەیامنێری کەی ئێن ئێن لە دهۆک رایگەیاند، لە رۆژی پێنجشەممەوە لە بەشێک لە بەنزینخانەکانی سنوری پارێزگاکە بەهۆی کەمبونەوەی خواست لەسەری، یەک لیتر بەنزینی جۆری نۆرماڵ 50 دینار دابەزیوە.

ئەحمەد جەمیل، خاوەنی یەکێک لە بەنزینخانەکانی دهۆک بە کەی ئێن ئێنی رایگەیاند، بەنزینی نۆرماڵ خواستی کەم لەسەر بۆیە لە رۆژی پێنجشەممەوە نرخەکەی 50 دینار دابەزیوە و لیترێک بە 850 دینارە.

وتیشی: لە ئێستادا لیترێک بە نزینی نۆرماڵ بە 850 دینار و یەک لیتر بەنزینی موحەسەن بە 1150 دینار و یەک لیتر بەنزینی سوپەر بە 1275 دینارە.

هاوکات، پەیامنێری کەی ئێن ئێن لە هەولێر رایگەیاند، نرخی بەنزین لە هەولێر 25 تا 50 دینار هەرزان بوە، بەڵام شۆفێران هێشتا ناتوانن بەو نرخە وەریبگرن، بۆیە بە ناچاری نۆرە دەگرن بۆ بەنزینی بەنزین بە نرخی پاڵپشتیکراو کە لیترێک بە 750 دینارە.

ئەوەش لە کاتێکدایە، سەرباری بڕیار و رێنماییەکانی وەزارەتی سامانەسروشتییەکان بۆ هەرزانکردنی نرخەکەی، بەڵام تا ئێستا نرخی بەنزین لە سلێمانی بەبەرزی ماوەتەوە.

مەسعود هادی/ دهۆک
محەمەد ئەحمەد/ هەولێر