ئیدارەی خۆبەڕێوەبەری رۆژئاوای کوردستان گشتاندنێکی بۆ دیاریکردنی کرێی خانو بڵاوکردەوە و دەڵێت: بڕیارەکەیان بۆ بەرژەوەندی گشتی و دۆخی مرۆییە و داوا دەکات هاوڵاتییان پێوەى پابەند بن.  

هەواڵ:KNNC

دەستەی بەڕێوەبەری خۆجەییەکان لە ئیدارەی خۆبەڕێوەبەرایەتی باکور و رۆژهەڵاتی سوریا گشتاندنێکی بۆ دیاریکردنی کرێێ خانو بڵاوکردەوە و لە نوسراوەکەدا ئاماژە بەوەکراوە، لەبەر بەرژەوەندی گشتی و بە لەبەرچاوگرتنی دۆخی هەنوکەیی و مرۆیی و پابەندبونیان بە پرەنسیپە مرۆیەکان ئەو بڕیارە دراوە. 

لە بڕیارەکەدا 10 دۆلار (140 هەزار لیرەی سوری) بۆ هەر ژورێک لە گوندەکان، خانو و باڵەخانە کۆنەکانی دەوروبەری شارەکان و ناو شارەکان و 15 دۆلاریش (210 هەزار لیرەی سوری) بۆ هەر ژورێکی خانو و باڵەخانە نوێکان لە شارەکان دیاری کراون. 

بەگوێرەی نووسراوەکە هەر کەسێک سەرپێچی ئەو گشتاندنە بکات، رێکاری یاسایی بەرامبەر دەگیرێتەبەر و سزاکەشی لەنێوان 200 دۆلار بۆ 1000 دۆلار دەبێت و مۆڵەتیش لە خاوەن نوسینگەکانی خانوبەرە وەردەگیردرێتەوە.