یەکێتیی نوسەرانی کورد ھەواڵی کۆچی دوایی نوسەری گەورەی کورد، مامۆستا کەمال غەمبار رادەگەیەنێت.

هەواڵ: (KNNC)


ئەمڕۆ دوشەممە (30ـی 12ـی 2024) لقی هەولێری یەکێتیی نوسەرانی کورد بڵاویكردەوە: ھەواڵی کۆچی دوایی نوسەری گەورەی کورد، مامۆستا کەمال غەمبار رادەگەیەنین و پرسە و سەرەخۆشیی ئاڕاستەی بنەماڵە و نوسەران و دۆست و خزمانی دەکەن.

کەمال حسێن  ئەحمەد، ناسراو بە کەمال غەمبار لەساڵی (1937) لە شاری کۆیە لەدایکبوە، ساڵی (1945) لە قوتابخانەی کۆیسنجەقی دوەم لە شاری کۆیە چوەتە بەرخوێندن و لە ساڵی (1951) تەواوی کردوە، ساڵی (1957)  خوێندنی دواناوەندی لە هەولێر تەواوکردوە.

لەبەشی زمانی عەرەبی لە کۆلێژی پەروەردەی زانکۆی بەغدا وەرگیراوە و ساڵی (1964) تەواوی کردوە و بڕوانامەی بەکالۆریۆسی لە زمان و ئەدەبی عەرەبی بەدەستهێناوە و لە باشوری عێراق چەند ساڵێك مامۆستا بوە، لە ساڵی (2006) بە راوێژکاری پەروەردەیی لە ئەنجومەنی وەزیران خانەنشینکراوە.

کەمال غەمبار خاوەنی دەیان نوسین و کتێبی چاپکراو بوە و ئەندامی دەستەی بەڕێوەبردنی لقی هەولێری یەکێتیی نوسەرانی کورد بو، یه‌كێكه‌ له‌ ره‌خنه‌گره‌ ناسراوه‌كانی کورد، لە کۆتایی پەنجاکانی سەدەی رابردوەوە به‌ زمانەکانی عه‌ره‌بی و كوردی دەستی بە نوسین و رەخنەی ئەدەبی کردوە، یه‌كه‌م نوسینی ره‌خنه‌یی ئه‌ده‌بی به‌ زمانی عه‌ره‌بی له‌ گۆڤاری (الثقافە) لە ساڵی (1973) بڵاوکردوەتەوە.