فەرماندەیی ناوەندی ئەمەریکا رایگەیاند، بەردەوام دەبن لە کارکردن لەگەڵ کۆمەڵگەی نێودەوڵەتی بۆ گواستنەوەی ژن و منداڵی چەکدارانی داعش بۆ وڵاتانی خۆیان، لەسەردانێکیشدا بۆ رۆژئاوای کوردستان لەگەڵ ژمارەیەک لە بەرپرسان هەسەدە کۆبوەوە.

هەواڵ:KNNC

فەرماندەیی ناوەندیی ئەمەریکا بڵاویکردەوە، جەنەرال مایکڵ کوریلا سەردانی سوریای کردوە و لەگەڵ ژمارەیەک لە بەرپرسانی هێزەکانی سوریای دیموکرات (هەسەدە) کۆبوەتەوە.

ئاماژەی بەوەشکردوە، ئامانجی سەردانەکە هەڵسەنگاندن بوە بۆ پێشهاتەکانی سوریا و هەڵمەتەکانی روبەڕوبونەوەی داعش لەو ناوچانە.

هەروەها، مایکڵ کۆریلا سەردانی کامپی هۆل-ـی کردوە، کە هەزاران ژن و منداڵی چەکدارانی داعشی تێدایە، رایگەیاندوە، سوپایەکی داعش لە نێو کەمپەکەدا هەن، ئیدارەی ئەمەریکا سەرنجی لەسەر گەڕانەوەی ژن و منداڵی چەکدارانی داعشە بۆ وڵاتانی خۆیان.

جەختیشیکردوەتەوە، بەردەوام دەبن لە هەماهەنگیان لەگەڵ کۆمەڵگەی نێودەوڵەتی بۆ گواستنەوەی چەکدارانی داعش بۆ وڵاتانی رەسەنی خۆیان و دادگاییکردنیان.

سەردانەکەی ژەنەراڵ کۆرێلا بۆ سووریا لە چوارچێوەی گەشتێکی هەشت رۆژەی بوو بۆ بەحرەین، سعودیە، کەشتی فڕۆکەهەڵگری یوئێس ئێس هاری ئێس ترومان لە دەریای سوور، میسر، لوبنان، ئیسرائیل، عێراق، ئووردن و سووریا.