وەزیرى دەرەوەى سوریا لە کۆبونەوەیدا لەگەڵ سەرۆکى حکومەتى هەرێمى کوردستان کورد وەک خوشک و برا و پێکهاتەیەکى رەسەنى وڵاتەکە ناودەبات و جەختیش لە پاراستنى مافەکانیان دەکاتەوە.

هەواڵ:KNNC

ئەمڕۆ، لە داڤۆس سەرۆکى حکومەتى هەرێم و ئەسعەد شەیبانى، وەزیرى دەرەوەى سوریا کۆبونەوە و هەردولا دۆخى گشتى سوریا و پەرەپێدانى پەیوەندییە دولایەنەکانیان و پێشهاتەکانى ئێستاى ناوچەکە تاوتوێ کراون.

لە کۆبونەوەکەدا وەزیرى دەرەوەى سوریا رایگەیاندوە؛ کورد خوشک و برای ئەوانن و پێکهاتەیەکی گرنگ و رەسەنی سوریان و وتویەتى:" دڵنیایی دەدەین کە مافەکانیان پارێزراو دەبێت."

فەرمانگەى میدیا و زانیارى حکومەتى هەرێم  لەبارەى ناوەڕۆکى کۆبونەوەکەوە ئەوەشى خستوەتەڕو کە سەرۆکى حکومەت لەلایەن شەیبانییەوە بانگهێشتى سوریا کراوە و ئەوەشخراوەتەڕو کە هەردولا هاوڕابون لەسەر پێویستیی پاراستنیی مافی هەمو پێکهاتەکانی سوریا و لەنێویشیاندا گەلی کورد.