یۆنامی رایگەیاند، پێویستە چاکسازیی یاسایی لە عێراق، هاوتای پابەندییە نێودەوڵەتییەکان بێت، دەشڵێت: نەتەوەیەکگرتوەکان بەردەوام دەبێت لە پشتیوانیکردنی عێراق.

هەواڵ:KNNC

نێردەى نەتەوە یەكگرتوەكان بۆ عێراق - یۆنامی، رایگەیاند، چاودێریی دوایین پێشهاتەكانی عێراق دەكات لەبارەی بڕیاری پەرلەمان بۆ هەمواركردنەوەی یاسای باری كەسێتی و پەسەندكردنی چەند پرۆژەیاسایەكی گرنگی تر.

جەختیكردەوە، لە گرنگی زامنكردنی چاكسازیی یاسایی لە عێراق و هاوتای پابەندییە نێودەوڵەتیەكان بێت لەبوارەكانی مافەكانی مرۆڤ، بەتایبەت پاراستنی ماف و خۆشگوزەرانی ژنان و منداڵ.

دەشڵێت: چاكسازیی دەبێت بەشێوەیەك بێت وەڵامدەرەوەی خواستی گەلی عێراق بێت و پارێزگاری لە دەستكەوتە مێژوییەكان بكات.

یۆنامی دڵنیایشی داوە، نەتەوە یەكگرتوەكان بەردەوام دەبێت لە پشتیوانیكردنی عێراق لە خواستەكانی بۆ دەوڵەتی یاسا و رێزگرتن لە مافەكانی مرۆڤ و لەو پێناوەشدا لە هەوڵەكانیان لەگەڵ لایەنە پەیوەندیدارەكان بەردەوام دەبن.