بەمەبەستى پشتگیریی لە مامۆستا مانگرتوەکانى شارى سلێمانى، ئەمڕۆ ژمارەیەک مامۆستا لە شارى هەڵەبجەوە بەرەو سلێمانى بەڕێدەکەون و بڕیارە دواتر ئەوانیش هەڵوێستى خۆیان بەشێوەى جیاوازتر رابگەیەنن.

هەواڵ:KNNC

بەیانى ئەمڕۆ شەممە، ژمارەیەک مامۆستا لە شارى هەڵەبجەوە بەرەو شارى سلێمانى بەڕێدەکەون بەمەبەستى سەردانکردنى خێمەى مامۆستایانى مانگرتو لە شارەکە و پشتگیریی خۆیانیان بۆ رادەگەیەنن، بڕیاریشە دواى گەڕانەوەیان هەڵوێست و ناڕەزایەتیی خۆیان بەشێوەى جیاواز رابگەیەنن.

یەکێک لەو مامۆستایانەى لە هەڵەبجەوە بەرەو سلێمانى بۆ پشتگیریی مانگرتوان دەچێت بە کەى ئێن ئێن،ى وت: لە ماوەى ساڵانى رابردودا چەندین رێکارى جیاوازیان گرتوەتەبەر بۆ دەربڕینى ناڕەزایەتییەکانیان و ئەم مانگرتنەش رێگایەکى دیکەى مەدەنییە بۆ گەیاندنى دەنگى ناڕازیی و بەدەستهێنانى مافەکان.

بەشێکى دیکەش لە مامۆستایان ئەوەیان خستەڕو کە ئەوان ئەم سەردانە دەکەن هەم وەک ئەرکێک کە لەسەر شانیان و هەم وەک پاڵپشتییەکى دەرونى بۆ مامۆستایانى مانگرتو ئەنجام دەدەن و دەڵێن: "پێشتر چەندین زمانمان تاقیکردوەتەوە و وتومانە کە ناڕازین و مانگرتنیش زمانێکى دیکەى گەیاندنى ناڕەزایەتییەکانە".

ئەمڕۆ رۆژى پێنجەمە، ژمارەیەک مامۆستا لە شارى سلێمانى مانگرتنیان راگەیاندوە و لەبەردەم بیناى نەتەوەیەکگرتوەکان خێمەى ناڕەزایەتییان هەڵداوە و نان و ئاو ناخۆن و ناخۆنەوە، بەشێکیان تەندروستیان بەهۆى نەخواردن و سەرماوە بەرەو خراپى دەچێت و هێشتاش هیچ لایەنێکى پەیوەندیدار بەدەم داواکانییانەوە نەچوە.

هەڵەبجە/ئەستێرە حسێن