ئەو شاندە هونەرییەی ماوەی 11 رۆژ لە هەرێمی کوردستان بون، رۆژی پێنجشەممە گەڕانەوە بەغداد و ماوەی دوو رۆژە کۆبونەوەکانیان دەستپێکردوە، ئەگەر ئەمڕۆ بگەنە رێککەوتنی کۆتایی بڕیارە سبەینێ یەکەم گوژمەی پارە بۆ موچەی مانگی 1ـی ئەمساڵ رەوانەی هەرێم بکرێت.

هەواڵ:KNNC

پەیامنێرى کەى ئێن ئێن رایگەیاند؛ لە کاتژمێر 8:00ـى بەیانى ئەمڕۆوە کۆبونەوەى شاندە هونەرییەکەى نێوان هەرێم و بەغداد دەستپێکردوە، ئەو لیژنەیە چوار راپۆرتیان تایبەت بە کێشەکانى نێوان هەرێم و بەغداد ئامادەکردوە و بڕیارە تەواوى تێبینییەکانى سەر لیستى موچەى مانگى 1 چارەسەر بکەن تا جارێکى دیکە کێشە بۆ لیستى موچە دروست نەبێتەوە.

ئاماژەى بۆ ئەوەشکرد کە ئەگەر ئەمڕۆ ئەم لیژنەیە بگەنە رێککەوتن، ئەوا ئێوارەى ئەمڕۆ بۆ جارى دوهەم شاندى باڵاى هەرێم و بەغداد کۆدەبنەوە و بڕیار دەدرێت سبەینێ یەکەم گوژمەى موچەى مانگى 1ـى ئەمساڵ رەوانە بکرێت.

رۆژى رابردو بۆ ماوەى چوار کاتژمێر کۆبونەوەى شاندى باڵاى نێوان هەرێمى کوردستان و بەغداد بەڕێوەچو، وەزیرى دارایی هەرێم رایگەیاند؛ "ئومێد دەکەن رۆژى یەکشەممە پارەى موچە بگاتە هەرێم"  بەپێی زانیارییەکانى کەى ئێن ئێنیش؛ ئەگەر ئەمڕۆ هەردو شاندە هونەرییەکە لەم کۆبونەوەیەیان ئەو سەرنج و تێبینییانە چارەسەر بکەن کە وەزیرى دارایی هەیبوە، بڕیار لەسەر ناردنى پارە دەدرێت.

بەشێک لەو تێبینیانەى لەسەر لیستى موچەى مانگى یەک هەبوە تایبەت بوە بە گواستنەوەى خانەنشینانى یەکەکانى 70 و 80 بۆسەر خانەشینى وەزارەتى دارایی هەرێمى کوردستان و بەشێکى دیکەیش پەیوەندیی بە پرسى هاوتاکردنى موچەى خانەنشینانى هەرێمەوە هەیە کە پێش بڕیارەکەى دادگاى فیدراڵى موچەکانیان هاوتا کراوە.

ئەمڕۆ 1ـى شوباتە، تا ئێستا موچەى مانگى 12 و 1ـى موچەخۆران و فەرمانبەرانى هەرێمى کوردستان دابەش نەکراوە، ناڕەزایەتییەکان بەردەوامن و بایکۆت هۆڵەکانى خوێندنى لە شارى سلێمانى گرتوەتەوە، ماوەى پێنج رۆژیشە وەک ناڕەزایەتییەک، ژمارەیەک مامۆستا لە شارى سلێمانى لەبەردەم بیناى نەتەوەیەکگرتوەکان مانگرتنیان راگەیاندوە.

سلێمانى/ بڕیار نامیق