حکومەتى هەرێمى کوردستان لەڕێی وتەبێژەکەیەوە بە فەرمیی لەبارەى مانگرتوانى شارى سلێمانییەوە قسەى کرد و رایگەیاند؛ بەشێکیان دەیانەوێت لەسەر حسابى خەڵکى هەژار خۆیان دەوڵەمەند بکەن، وتیشى: لەم چەند رۆژەدا موچە دەگات و دەست بە دابەشکردنى دەکرێت.

هەواڵ:KNNC

پێشەوا هەورامى بەناوى حکومەتى هەرێمەوە لە کۆنگرەیەکى رۆژنامەوانیدا وتى: بەشێک لە مانگرتوەکان دەیانەوێت لەسەر حسابیى خەڵکى هەژار خۆیان دەوڵەمەند بکەن.

وتى: بەشێک لەو مامۆستایانەى ئێستا لەژێر خێمەدان، خۆپیشاندان و جادەگرتنیان بۆ ئەوەبو ئێمە بچینە بەغداد موچە وەربگرین و وتیشى: پێشتر ئەم سیناریۆیانەمان بینیوە و بەشێکیان خۆیان کاندید دەکەین و لەسەر حسابى خەڵکى هەژار خۆیان دەوڵەمەند دەکەن.

لەبارەى مامۆستایانى مانگرتوەوە وتەبێژى حکومەت وتیشى: بەشێک لە مامۆستایانى مانگرتو وەک نوێنەرى هەندێک سەرکردەى دژى کورد تەماشا دەکەین و وتى: هەندێکیان هێندە باوەشیان بە هەندێک سەرکردەى میلیشیا عێراقییەکاندا کردوە رەنگى ئەوانیان گرتوە

وتیشى: لە دوو رۆژى داهاتودا موچەى موچەخۆرانى هەرێم خەرج دەکرێت  و دواتر بە زوترین کات دابەشکردنەکەى دەستپێدەکات.

ئەوەشى خستەڕو کە تا ئێستا شاندى هەرێم لە بەغدادن و شاندەکە تەنها لەبارەى موچەى یەک مانگەوە گفتوگۆ ناکات.

ئەوەشى ئاشکرا کرد کە موچەى مانگى 12 بەشێکە لە گفتوگۆکانى شاندى هەرێمى کوردستان و بەرپرسانى حکومەتى عێراق و دۆسییەکە دانەخراوە.