چوارچێوەی هەماهەنگی پشتیوانی بڕیارەکەی دادگای فیدراڵی بۆ راگرتنی ئەو سێ یاسایە دەکات کە 21ى مانگى رابردو لە ئەنجومەنى نوێنەرانى عێراق پەسەند کران و جەختیش لە پابەندبون بە رێککەوتنە سیاسییەکان دەکاتەوە.

هەواڵ:KNNC

چوارچێوەی هەماهەنگی لە راگەیەنراوێکدا ئەوەى ئاشکرا کردوە کە پشتیوانى بڕیارەکەی دادگای فیدراڵی دەکەن بۆ راگرتنی جێبەجێکردنی یاساکانی هەمواریی باری کەسیی و گەڕاندنەوەی موڵک و ماڵ و لێبوردنی گشتیی، کە 21ی مانگی رابردوی ئەنجومەنى نوێنەرانى عێراقدا تێپەڕێنران، چونکە پەسەندکردنی سێ یاسا پێکەوە و بەبێ ئامادەبونی رێژەى یاسایى ئەندامان پێشهاتێکی مەترسیدار و پێشێلێکی زەقی یاسا و پەیڕەوی ناوخۆیە.


راشیانگەیاندوە: گرتنەبەرى ئەو رێکارە، مافێکی دەستوری دادگایە و رێڕەوێکی یاساییە لە ناو پڕۆسەی دیموکراسیدا.

چوارچێوەى هەماهەنگى جەختیشی لە پابەندبون بە کارنامەی حکومەت و رێککەوتنە سیاسییەکان و رێزگرتن لە دەسەڵاتی دادوەریی و جیاکردنەوەى دەسەڵاتەکان کردوەتەوە، لەپێناو حکومڕانیەکی راست و کۆتاییهێنان بە ناکۆکی هێز و پێکهاتە جیاوازەکان.