ئەمڕۆ دوشەممە، د. لەتیف رەشید لە کۆشکی سەلام لە بەغداد پێشوازی کرد لە دانا ئەحمەد مەجید رێکخەری بزوتنەوەی گۆڕان و شاندێکی یاوەری.

هەواڵ:KNNC

لەکۆبونەوەیەکدا دوایین پێشهاتەکانی بارودۆخی سیاسی و ئابوری عێراق بەگشتی و هەرێمی کوردستان بەتایبەتی تاوتوێکران و سەرۆک کۆمار گرنگی هەوڵدانی لایەنە سیاسییە کوردییەکانی خستەڕو بۆ گەیشتن بەچارەسەری ڕیشەیی بۆ کێشەکانی هەرێم و هەنگاوی پراکتیکیی بەرەو لێکتێگەیشتن و کاری هاوبەش و یەکڕیزی لەپێناو پێشکەشکردنی خزمەت بەهاوڵاتیان و دەستەبەرکردنی مافەکانی سەرجەم هاوڵاتیان.

سەرۆک کۆمار جەختیکردەوە، لەسەر پێویستی پەیڕەوکردنی میتۆدی دیالۆگی دێموکراسی بۆ چارەسەرکردنی کێشە نیشتیمانیەکانی کوردستان و گرتنەبەری ئامرازی هاوبەش بۆ بەدیهێنانی یەکڕیزیی نیشتیمانی و بەهێزکردنی بۆ ڕوبەڕوبونەوەی ئاستەنگەکانی قۆناغەکە.

لەبەرامبەردا وەفدی بزوتنەوەی گۆڕان سوپاسی سەرۆک کۆماریان کرد بۆ ئەو پێشوازییە گەرمەی و پەرۆشییان بۆ پاراستنی مافەکانی گەلی کورد وەک براکانیان لەپێکهاتەکانی تری عێراق دووپاتکردەوە لەپێناو بەهێزکردنی ئاسایش و سەقامگیری لەهەرێم و وڵات بەگشتی.