روانگەی سوری بۆ مافەکانی مرۆڤ رایگەیاند، لە شەڕی نێوان هێزە ئەمنییەکان و گروپە  چەکدارەکانی سوریا زیاتر لە 70 کەس کوژراون و دەیان کەسیش برینداربون.

هەواڵ:KNNC

ئەمڕۆ هەینی روانگەی سوری بۆ مافەکانی مرۆڤ رایگەیاند، لانیکەم 70 کەس لە پارێزگای لازقیە بەهۆی پێکدادانی نێوان هێزە ئەمنییەکان و گروپە چەکدارییەکان، کوژراون دەیان کەسیش برینداربون و چەندین کەسیش بە دیل گیراون.

ئاماژەی بەوەشکردوە، شەوی رابردو تا بەرەبەیانی ئەمڕۆ هەینی قەدەغەی هاتوچۆ لە پارێزگای لازقیە سەپێنراوە و بڕیارەکەش تا کاتژمێر (10:00)ـی ئەم بەیانییە درێژکراوەتەوە و لەو گەڕەکانەش قەدەغەی هاتوچۆ جێبەجێدەکرێت کە عەلەوییەکان تێیدا نیشتەجێن.

هاوکات، مەیجر مستەفا کنەفاتی بەڕێوەبەری بەشی ئاسایشی گشتی لە پارێزگای لازقیە، ڕایگەیاند، لە چوارچێوەی هێرشێکی پێشوەختە پلان بۆ داڕێژراو و بە ئەنقەست، چەند گروپێک لە پاشماوەی میلیشیاکانی ئەسەد هێرشیان کردە سەر خاڵ و بازگەکان، هەروەها زۆرێک لە دەورییەکانیان لە ناوچەی جەبلە و لادێکانی کردە ئامانج، کە لە ئەنجامدا شەهید و برینداری زۆر لەنێو هێزە ئەمنییەکان کەوتوەتەوە.

ئەم هێرشانە بە توندوتیژترین هێرشەکان لە دوای ڕووخانی ئەسەدەوە دژی دەسەڵاتە نوێیەکە دادەنرێت.

پەیوەست بە ئاڵۆزییەکانی سوریا، ئیدارەی خۆبەڕێوەبەری باکور و رۆژهەڵاتی سوریا لە بەیاننامەیەکدا رایگەیاند، هۆکاری ئاڵۆزییەکان خوێندنەوەی هەڵەی واقیعی سوریایە لەلایەن دەسەڵاتدارانەوە، دەشڵێت: ئەو دۆخەی دروست بوە ڕەنگە هۆکارێک بێت بۆ ئەنجامدانی کۆمەڵکوژی.

داواش لە هەمو لایەنەکان دەکات، حیکمەت و خۆگرتن بەکاربهێنن بۆ ڕاگرتنی ئەم دۆخە، هاوکات داوا لە هاوڵاتیانی سوریا دەکات پشتیوانی ئەوانە نەکەن کە هەوڵی هەڵگیرسانی شەڕی ناوخۆ دەدەن.