دۆنالد ترەمپ رایگەیاند، بۆ ئەنجامدانی ڕێککەوتنی بازرگانی زەبەلاح سەردانی سعودییە دەکات، بەڵام وتی: کاتی سەردانەکە ئاشکراناکەم.

هەواڵ:KNNC

دۆناڵد ترەمپ، سەرۆکی ئەمەریکا رایگەیاند، پەیوەندییەکی باشی لەگەڵ سعودییە هەیە بەوپێیەی ئەو وڵاتە وەبەرهێنانێکی گەورە دەخاتە ناو ئەمەریکاوە.

وتیشی: پلانم هەیە گەشت بۆ سعودییە بکەم، ئامانجی سەردانەکەش ئەنجامدانی رێککەوتنی بازرگانی زەبەلاح دەبێت، چونکە بە سعودییەکانم وت دێمە وڵاتەکەتان ئەگەر ترلیۆنێک دۆلار بە کۆمپانیا ئەمەریکییەکان بدەن، ئەوانیش بەوە رازی بون، بۆیە دەچمە سعودییە.

بە وتەی ترەمپ، بڕیارە سعودییە بڕەپارەیەکی زۆر بۆ کەرەستەی سەربازی و کۆمپانیا ئەمەریکییەکان و چەندین شتی دیکە خەرج بکەن.

هاوکات، بەپێی هەواڵێکی ئاژانسی بلومبێرگ، ڤۆلۆدیمێر زیلینسکی سەرۆکی ئۆکرانیا، رۆژی دووشەممەی داهاتو سەردانی سعودییە بکات، هەروەها، زیلینسکی لە تۆڕی کۆمەڵایەتی X نوسیویەتی، "تیمێک لە دانوستانکارانی ئۆکرانی لە سعودییە دەمێننەوە بۆ کارکردن لەگەڵ هاوبەشە ئەمەریکییەکانمان".