سەرۆکى یەكێـتی جیهانی زانایانی مسوڵمان پەیامێکی ئاڕاستەی ئەحمەد شەرع کرد و رایگەیاند، لەماوەی  رابردودا سەلماندوتانە کە شایستەی حیکمەت و سەرکردایەتین، "ئێمە لەگەڵتانین و پشتگیریتان دەکەین، باوەڕمان وایە دەتوانن بەیارمەتی خودا بەسەر ئاڵنگارییەکان زاڵبن".

هەواڵ:KNNC

لەبەشێکی دیکەی پەیامەکەی د. عەلی قەرەداغی سەرۆکى یەكێـتی جیهانی زانایانی مسوڵمانـ،دا هاتوە، " بە پشتبەستن بەو بەرپرسیارێتییە مێژوییەی کە لە ئەستۆتان گرتوە، ئەمڕۆ ئەو متمانە گەورەیەی لەم قۆناغە سەرەکییەی مێژوی خراوەتە سەرشانتان، سەلماندوتانە شایستەی حیکمەت و سەرکردایەتین و باش ئاگاداری مانای دادپەروەرین، مانایەک کە هێز ناگۆڕێت بۆ دڕندەیی".

دەشڵێت: هەمو لایەک پاڵپشتی هەوڵەکانتان دەکەن بۆ بەرقەرارکردنی ئاسایش و سەقامگیری و درک بەوە دەکەن کە پاشماوەکانی رژێمی پێشو هێشتا هەوڵی بڵاوکردنەوەی پشێوی و ناسەقامگیری ریزکانتان دەدەن.

د. عەلی قەرەداغی لە پەیامەکەیدا کە ئاڕاستەی ئەحمەد شەرع سەرۆکی سوریای کردوە ئاماژەی بەوەشکردوە، "روداوەکانی ئەم دواییە دەیسلمێنن کە هەوڵی نائومێدکەر هەیە بۆ گەڕاندنەوەی کاتژمێرەکە بۆ دواوە، بەڵام دڵنیاین کە ئێوە ئاگاداری ئەو پلانەن و درک بەوە دەکەن کە وەڵامدانەوەکە دەبێت بە حیکمەتێک بێت کە پیلانگێڕییەکان پوچەڵ بکاتەوە و بەتوندی کۆتایی بە هەر وەهمێک بهێنە کەدەستکاری ئاسایش و داهاتوی وڵات دەکەن".