ئەمڕۆ شاندێکی دەمپارتی سەردانی بزوتنەوەی گۆڕانی کرد و بە فەرمی بزوتنەوەکەی بانگهێشتی مەراسیمی نەورۆزی ئەمساڵی ئامەد کرد.

هەواڵ:KNNC

ئەمڕۆ شاندێکی دەمپارتی بە سەرۆکایەتی (وەزیر پارلاک دۆشکۆن) پەرلەمانتاری دەمپارتی لە پەرلەمانی تورکیا سەردانی بزوتنەوەی گۆڕانیان کرد و لەلایەن دانا ئەحمەد مەجید رێکخەری گشتی بزوتنەوەکە و شاندێکی یاوەری پێشوازییان لێکرا.

ئامانجی سەردانی شاندەکەی دەمپارتی، بەفەرمی بانگهێشتکردنی بزوتنەوەی گۆڕان بو بۆ مەراسیمی نەورۆزی ئەمساڵ لە ئامەد-ـی باکوری کوردستان، ئاهەنگی نەورۆزی ئەمساڵ لەکاتێکدا دەکرێتەوە کە پرۆسەی سیاسی و ئاشتی لە تورکیا و باکوری کوردستان چەند هەنگاوێک هاتوەتە پێشەوە، بەتایبەت لەدوای پەیامەکەی (عەبدوڵا ئۆجەلان) رێبەری زیندانیکراوی پەکەکە.

دانا ئەحمەد مەجید، رێکخەری گشتی بزوتنەوەی گۆڕان سوپاسی شاندی دەمپارتی کرد و پاڵپشتی بزوتنەوەکەی بۆ پرۆسەی ئاشتی دوپاتکردەوە و رایگەیاند، لە 40 ساڵی رابردودا بە ئەزمون سەلمێنراوە کە شەڕ و جەنگ، چارەسەر ناکۆکییەکان ناکات، بەڵکو گەڕانەوە بۆسەر مێزی گفتوگۆ باشترین بژاردەیە بۆ چارەسەری کێشەکان.

هاوکات، هانی شاندی دەمپارتی دا هەوڵی لابردنی ئەو بەربەست و لەمپەرانە بدەن کە لەبەردەم پرۆسەی ئاشتی هەن، ئامادەیی بزوتنەوەی گۆڕانیشی دەربڕی بۆ ئامادەیی و بەشداری لە مەراسیمی نەورۆزی ئامەدی ئەمساڵ.