سەرۆکى ئەمەریکا و فەرماندەیی ناوەندى وڵاتەکە، کوشتنى ئەبو خەدیجە، جێگرى خەلیفەى داعش-یان راگەیاند؛ ترەمپیش لەوبارەیەوە دەڵێت: بە هەماهەنگى لەگەڵ هێزەکانى عێراق و هەرێمى کوردستان ژیانە نەگبەتەکەى کۆتاییهات.

هەواڵ:KNNC

فەرماندەیی ناوەندى ئەمەریکا لە تۆڕى کۆمەڵایەتیی ئێکس ساتى کوشتنى ئەو سەرکردەیەی داعشیان بڵاوکردوەتەوە بەناوى عەبدوڵڵا مەکی موسڵح روفەیعی كە نازناوی (ئەبو خەدیجە)ـی هەبوە و ئاماژەیان بۆ ئەوەکردوە کە کارەکەیان بە هەماهەنگى لەگەڵ هێزەکانى هەواڵگریی و ئاسایشى عێراق لە پارێزگاى ئەنبار ئەنجامداوە.

بەپێی زانیارییەکانى فەرماندەیی ناوەندى ئەمەریکا؛ ئەبو خەدیجە ئەرکی بەرزترین دەستەى بڕیاردان بوە لە رێکخراوى داعش و بەرپرس بوە لە ئۆپەراسیۆنەکان و ئەو هێرشانەى لەسەر ئاستى نێودەوڵەتى ئەنجامدراون و لەگەڵیشیدا دوو چەکدارى دیکە کوژراون کە پشتیێنەى تەقینەوەیان پێوە بوە.

هەر لەوبارەیەوە، دۆناڵد ترەمپ، سەرۆکى ئەمەریکا لە تۆڕى کۆمەڵایەتیی تروس سۆشاڵ دەڵێت:"ئەمڕۆ سەرکردە هەڵاتوەکەى داعش لە عێراق کوژرا، ئەو بێ وەستان لەلایەن شەڕکەرە ترسناکەکانمانەوە راو کرا".

دەشڵێت: لەگەڵ چەند ئەندامێکى دیکەى داعش، کۆتایی بە ژیانە نەگبەتەکەى هات، بە هەماهەنگى لەگەڵ حکومەتى عێراق و حکومەتى هەرێمى کوردستان.

هاوکات رۆژى رابردو، محەمەد شیاع سودانی، سەرۆک وەزیرانی عێراق لە تۆڕی كۆمەڵایەتی (X) بڵاویكردەوە؛ هێزە ئەمنییەكانیان توانیویانە (ئەبو خەدیجە) کە پۆستی جێگری خەلیفەی هەبوە لە عێراق و سوریا بکوژن.

دواتر ئەنجومەنی ئاسایشی هەرێمی کوردستان لە راگەیەنراوێکدا رایگەیاند؛  پشتبەستن بە زانیارییەکانی ئێمە و هەماهەنگی لەگەڵ هاوپەیمانان و دواتر هێزە عیراقییەکان، جێگری خەلیفەی داعش کوژرا، بەڵام لە راگەیەندراوەکەی سودانیدا ئاماژە بە رۆڵی سەرەکیی ئەنجومەنی ئاسایشی هەرێمی کوردستان نەکراوە.

ئاماژەیان بۆ ئەوەشکردوە کە کوشتنى ئەم سەرکردەیە لەسەر بنەماى چەندین ساڵ بەدواداچون و پشبەستن بە زانیارییەکانى ئەوان و هەماهەنگى لەگەڵ هاوپەیمانان و دواتر لەگەڵ هێزە عێراقییەکان بوە، بەڵام سودانى لە راگەیەنراوەکەدا هیچ ئاماژەیەکى بە رۆڵى سەرەکی ئەوان نەکردوە.