کۆبونەوەى نێوان سەرۆکى یەکێتى و جێگریی دوەمى سەرۆکى پارتى لە پیرمام کۆتاییهات، هەردولا جەختیان کردەوە کە کۆبونەوەیەکى سەرکەوتویان ئەنجامداوە و لەسەر چەند پرسێکى ستراتیژیی رێککەوتون.

هەواڵ:KNNC

دواى کۆتاییهاتنى کۆبونەوەکە بافڵ تاڵەبانى، سەرۆکى یەکێتى رایگەیاند؛ "ئەوەى من تێگەیشتم كۆبونەوەكەمان زۆر زۆر باش بو، لەسەر چەند شتێكی ستراتیژیی كە بۆ میللەتەكەمان باش بێت رێككەوتوین و پێشم وایە گفتوگۆکانمان بەردەوامە و هەدەفمانە حکومەتێک دروست بکەین بۆ خزمەتى میللەتەکەمان".

لاى خۆیەوە مەسرور بارزانى، جێگریی دوەمى سەرۆکى پارتى وتى:" ئەمە دوجارە ئێمە كۆبونەوەی زۆر ئەرێنی و باشمان ئەنجامدا بۆ لێکنزیکبون و تاوتوێکردنى ئەو بابەتانەى بۆ خەڵکى کوردستان و ناوچەکەمان گرنگن.

وتیشى:" پێشكەوتنى زۆر باش  و تێگەیشتنی زۆر باش لەسەر زۆر لە بابەتەكان هەبوە. ئومێدەوارین تیمەكانیش بتوانن هەر بەو رۆحیەتە بگەتە رێككەوتنێكی تەواو لەسەر پێكهێنانی حكومەت لەكاتێكی نزیكدا و خەڵکى کوردستانیش هەمویان دڵیان خۆش بێت بەو بەرەوپێشچونانەى لەنێوانماندایە.

لە 20ـى 10ـى ئەمساڵ هەڵبژاردنى شەشەمین خولى پەرلەمانى کوردستان بەڕێوەچو، لە 2ـى 12ـش دانیشتنى یەکەمى پەرلەمان بۆ سوێندخواردنى پەرلەمانتاران کرا و لەوکاتەوە تا ئێستا، نە پەرلەمان دەستى بە کارەکانى کردوە و نە ئاسۆى پێکهێنانى حکومەتى نوێ و کابینەى دەیەم رۆشنە.