حەوت ساڵ بەسەر داگیرکردنی شاری عەفرینی رۆژئاوای کوردستان لەلایەن تورکیا و گروپە چەکدارەکانییەوە تێپەڕ دەبێت، ئیدارەی خۆبەڕێوەبەرییش دەڵێت: تورکیا تا ئێستاش بەردەوامە لە هێرش و داگیرکارییەکانی.

هەواڵ:KNNC

ئەمڕۆ 18ی ئازار، حەوت ساڵ تێدەپەڕێت بەسەر داگیرکردنی عەفرین لەلایەن تورکیا و گروپە چەکدارەکانی هاوپەیمانی، کە لە 20ی کانونی دوەمی ساڵی 2018دا بەبەکارهێنانی فڕۆکە و تانک و ئامێری پێشکەوتوی سەربازیی دەستیان بە هێرش و پەلامارەکانیان کرد بۆسەر ناوچەکە.

پاش 58 رۆژ لە بەرگریکردنی شەڕڤانان و خەڵکی ناوچەکە لە 18ی ئازاردا عەفرین لەلایەن تورکیاوە داگیرکرا و زۆرینەی خەڵکەکەشی ئاوارەبون.

بەپێی ئامارەکان لەو کاتەوە زیاتر لە هەزار کەس لە عەفرین شەهیدبون و نزیکەی 10 هەزار کەسیش رفێنراون.

ئیدارەی خۆبەڕێوەبەری باکور و رۆژهەڵاتی سوریاش لەو یادەدا رایگەیاند، تورکیا بەردەوامە لە هێرش و داگیراکارییەکانی و پاش روخانی رژێمی سوریاش، دوبارە خەڵکی عەفرین لە شەهبا و تەلڕەفعەت ئاوارە بون.

ئیدارەی خۆبەرێوەبەری، داوای هاوکاریی دەسەڵاتی راگوزەری سوریا و دەستوەردانی کۆمەڵگەی نێودەوڵەتی دەکات بۆ فشارکردن لە تورکیا و گەڕانەوەی ئاوارەکانی عەفرین بۆ زێدی خۆیان.