دواى ئەوەى دوێنێ بە بیانوى ساختەکاریی بڕوانامەى بەکالۆریۆس و ماستەرەکەى هەڵوەشێنرایەوە،  ئەمڕۆ سەرۆکى گەورە شارەوانى ئیستانبوڵ لە ماڵەکەى خۆیدا دەستبەسەر کرا و لە گرتەیەکى ڤیدیۆییشدا دەڵێت: ئێمە روبەڕوی ستەمکارییەکی گەورە دەبینەوە، بەڵام دەمەوێت بزانن کە من وازناهێنم.

هەواڵ:KNNC


رۆژنامەى سۆزجو بڵاویکردەوە؛ بە تۆمەتى 'سەرکردایەتیی رێکخراوى تاوانکاریی'  و گەندەڵى ئەمڕۆ ئەکرەم ئیمامئۆغڵو، سەرۆکى گەورە شارەوانیی ئیستانبوڵ لەلایەن سەرۆکایەتیی داواکاریی گشتى ئیستانبوڵەوە دەستبەسەر کراوە و لەوبارەیەشەوە ئۆزگور ئۆزێل، سەرۆکى جەهەپە دەڵێت: تەسلیم نابین.


رۆژنامەکە ئاماژەى بۆ ئەوەکردوە کە نزیکەى 20 ئۆتۆمبێلى پۆلیس لەبەردەم ماڵى ئیمامئۆغڵو راگیراون و دەستبەسەربونیان راگەیاندوە و بەربەستیان لەبەردەم ماڵەکەى داناوە و رێگە بە هیچ کەسێک نادرێت بچێتە ناو ماڵەکەى جگە لە پارێزەرەکەى.


لە گرتەیەکى ڤیدیۆییدا کە ئیمامئۆغڵو لە ماڵەکەى خۆیدا بڵاوى کردوەتەوە دەڵێت: مشتێک عەقڵ بۆ ئەوەى هەوڵى دەستبەسەرداگرتنى ئیرادەى میللەتەکەمان دەدات و پۆلیسەکانمانى کردوەتە ئامڕازى خراپەکاریی، دەشڵێت:" دەمەوێت بزانن کە وازناهێنم'.

بەپێی زانیارییەکانى ئەو رۆژنامە تورکییە، سەرۆکى داواکاری گشتى ئیستانبوڵ فەرمانى دەستبەسەرکردنى بۆ 100 کەس دەرکردوە کە لەنێویاندا رۆژنامەنوس و بازرگان و سیاسەتمەداریان تێدایە، بە تۆمەتى سەرکردایەتیی کردنى رێکخراوە تاوانکارییەکان و بەرتیلدان و ساختەکاریی و چەند تۆمەتێکى دیکەش.

ئێوارەى دوێنێ، بەتۆمەتیی ساختەکاریی لە رێکارەکانى بەدەستهێنانى بڕوانامەکانى، هەردو بڕوانامەى بەکالۆریۆس و ماستەرى ئەکرەم ئیمامئۆغڵو هەڵوەشێنرایەوە و زانکۆى ئیستانبوڵیش لە  راگەیەنراوێکدا ساختەبونى بڕوانامەکان کردەوە.