ئەمڕۆ ئەنجومەنی وەزیران کۆدەبێتەوە و چارەنوسی ئەو فەرمانبەرانە یەکلادەکاتەوە کە لەمانگی حەوتی ساڵی رابردوەوە بەهۆی جێگیربونی میلاکەوە موچەیان بۆ نەبەستراوە، درێژکردنەوەی داشکاندنی سزاکانی سەرپێچی هاتوچۆ و گرفتی دەرچوانی کۆلیژی پزیشکیی گشتیی زانکۆ حکومییەکان بۆ ساڵی 2024 تاوتوێ دەکرێن.

هەواڵ:KNNC

سەرچاوەیەک لە ئەنجومەنی وەزیرانی هەرێم بە دیجیتاڵ میدیای KNNـی راگەیاند، کاتژمێر (11:00)ـی ئەمڕۆ ئەنجومەنی وەزیران بۆ تاوتوێکردنی سێ پرس کۆدەبێتەوە.

لە تەوەری یەکەمدا، وەزیری ناوخۆی هەرێم پێشنیاری وەزارەتەکەی بۆ درێژەدان بە بڕیاری داشکاندنی ڕێژەی 20% لە سزای سەرپێچی هاتوچۆ بۆ شەش مانگی دیکە پێشکەشدەکات بۆئەوەی تاکو (1-6-2025) بەردەوام بێت.

لە تەوەری دوەمیشدا، وەزیری دارایی و ئابوری راپۆرتێک پێشکەشدەکات کە تایبەتە بە یەکلاکردنەوەی چارەنوسی ئەو فەرمانبەرانەی لەسەر میلاکی دامەزراوەکانی حکومەتی هەرێم بەشێوەی هەمیشەیی و گرێبەست دامەزراون، بەڵام لە مانگی حەوتی ساڵی رابردوەوە بەهۆی جێگیربونی میلاکەوە موچەیان بۆ نەبەستراوە.

بەوتەی سەرچاوەیەکەی دیجیتاڵ میدیای KNN، لە تەوەری سێیەمدا د. سامان بەزرنجی وەزیری تەندروستی حکومەتی هەرێم بابەتی دەرچوانی کۆلێژی پزیشکی گشتی زانکۆ حکومییەکان بۆ ساڵی 2024 دەخاتەڕو، هاوکات داوای دامەزراندنی پزیشک و کارمەندانی تەندروستی دەکات بۆ پڕکردنەوەی ئەو کورتهێنانەی لە میلاکاتیان دروستبو.

سلێمانی - بڕیار نامیق