سەرچاوەیەک لە ئەنجومەنى وەزیران ناوەڕۆکى برڕیارەکانى کۆبونەوەى ئەمڕۆى ئەنجومەنەکەى بۆ کەى ئێن ئێن ئاشکرا کرد و بەوپێیە چارەنوسى ئەو فەرمانبەرانە یەکلایی کراوەتەوە کە هەشت مانگە موچەکانیان وەرنەگرتوە و لەبارەى دامەزراندنى دەرچوانى بەشە پزیشکییەکانیشەوە بڕیار دراوە.

هەواڵ:KNNC

سەرچاوەیەک لە ئەنجومەنى وەزیران بە کەى ئێن ئێن،ى راگەیاند؛ لە کۆبونەوەى ئەمڕۆیدا ئەنجومەنەکە بڕیاریداوە کە موچەى ئەو فەرمانبەرانەى لە مانگى تەمموزى ساڵى رابردوەوە دامەزراون و بەهۆى جێگیربونى میلاکەوە موچەکانیان بۆ نەبەستراوە، لە داهاتى ناوخۆ خەرج بکرێت.

ئەوەشى خستەڕو کە یەکێکى دیکە لە بڕیارەکانى کۆبونەوەى ئەمڕۆى ئەنجومەنى وەزیران ئەوەیە لێخۆشبونى 20% بۆ سەرپێچییەکانى هاتوچۆ تا 1ـى 6ـى ئەمساڵ درێژ بکرێتەوە.

لەبارەى دامەزراندنى دەرچوانى کۆلێژە پزیشکییەکانیشەوە، ئەمڕۆ ئەنجومەنى وەزیران لە کۆبونەوەکەدا پرسەکەى تاوتوێ کردوە و بڕیاردراوە لیژنەیەک رەوانەى بەغداد بکرێت و گفتوگۆ بۆ چارەسەرکردنى کێشەى دامەزراندنى ئەو دەرچوانە بکرێت.

سلێمانى/ بڕیار نامیق