وەزیری دەرەوەی ئێران ئاشكرای دەكات؛ دانوستانە ناڕاستەوخۆکانی نێوان تاران و واشنتۆن سەبارەت بەبەرنامەی ئەتۆمییەكەی وڵاتەكەی کۆتایی لە کەشێکی بنیاتنەردا بەڕێوەچوە.


هەواڵ: (KNNC)


لەدوای كۆتایی هاتنی دانوستانەكان لە مەسقەتی پایتەختی عوممان، عەباس عراقچی، وەزیری دەرەوەی ئێران لەڕێگەی تۆڕی كۆمەڵایەتی تەلەگرام رایگەیاند: خولی یەکەمی دانوستانە ناڕاستەوخۆکانی نێوان تاران و واشنتۆن لەسەر بەرنامەی ئەتۆمی وڵاتەكەی و هەڵگرتنی سزاكان کۆتایی هاتوە و كۆبونەوەكەش لە کەشێکی بنیاتنەردا بەڕێوەچوە.

بڵاویكردوەتەوە؛ بەنێوەندگیری سوڵتانییەتی عومان، وەزیری دەرەوەی ئێران و ستیڤ ویتکۆف، نێردەی تایبەتی سەرۆکی ئەمەریکا لەسەر بەرنامەی ئەتۆمی ئاشتیخوازانەی ئێران و هەڵگرتنی ئەو سزا نایاساییانەی کە بەسەر ئێراندا سەپێنراوە، گفتوگۆكراوە و لەڕێگەی وەزیری دەرەوەی عومانەوەجەخت لەڕێزگرتنی یەکتر كرایەوە.


وەزیری دەرەوەی ئێران ئاماژەی بەوەشکردوە، لەدانوستانە ناڕاستەوخۆكەدا هەردولا رێککەوتون لەسەر بەردەوامبونی كۆبونەوەكان و گفتوگۆكانیان لە هەفتەی داهاتو بەردەوام دەبێت.


میدیاكانی ئێران لەسەر زاری چەند سەرچاوەیەكی ئاگادار لە كۆبونەوەو دانوستانەكەی نێوان تاران و واشنتۆن لە عوممان ئاماژەیان بۆ ئەوەكرد، پێدەچێت دانوستانەكانی نێوان تاران و واشنتۆن لەسەر بەرنامە ئەتۆمییەكە بەرهەمیان هەبێت.