ئه‌نجومه‌نی ئاسایشیی نێوده‌وڵه‌تی سه‌ركۆنەی توندوتیژییه‌كانی ئه‌م دواییه‌ی لازقییه‌ و ته‌رتوس و چه‌ند ناوچه‌یه‌كی كه‌ناراوه‌كانی رۆژئاوای سوریای كرد و دەڵێت: توندوتیژییەكانی سوریا دۆخه‌كه‌ ئاڵۆزتر ده‌كات، مەترسی ئەوەی لێدەكرێت كە شه‌ڕی تائیفی له‌و وڵاتەدا دروستببێت.


هەواڵ: (KNNC)

ئەمڕۆ هەینی، ئەنجومەنی ئاسایشی نێودەوڵەتی كۆبوه‌، بەشێكی كۆبونەوەكەی بۆ روداوەكانی چەند رۆژی پێشوی سوریا تەرخانكرد كە تیادا ئه‌مه‌ریكا و روسیا راگەیەندراوێكی هاوبەشیان سەبارەت بەسه‌ركۆنه‌كردنی توندوتیژییه‌كانی ئه‌م دواییه‌ی لازقییه‌ و ته‌رتوس و چه‌ند ناوچه‌یه‌كی كه‌ناراوه‌كانی رۆژئاوای سوریای خوێندەوە و ئەنجومەنەكەش راگەیەندراوەكەی بەبڕیاری ژمارە (2254) په‌سندكرد.


لەبەشێكی راگەیەندراوەكەدا هاتوە: توندوتیژییەكانی سوریا دۆخه‌كه‌ ئاڵۆزتر ده‌كات، مەترسی ئەوەی لێدەكرێت كە شه‌ڕی تائیفی له‌و وڵاتەدا دروستببێت، داواشی كردوە لە هەمولایەك كردوە كە ئه‌و توندوتیژییانه‌ ڕابگرن مەترسی لەسەر سه‌لامه‌تی هاوڵاتییان و شوێنه‌ مه‌ده‌نییه‌كان دروستنەكەن.


راگەیەندراوە ئاماژەی بۆ ئەوەشكردوە، ئه‌نجومه‌نەكە هانی حكومه‌تی سوریا دەدات كە بۆ ڕوبه‌ڕوبونه‌وه‌ی هه‌ڕه‌شه‌ی چه‌كداره‌ بیانییه‌كان و لێپرسینه‌وه‌ له‌ بكه‌رانی كۆمه‌ڵكوژییه‌كان، رێوشوێنی یه‌كلاكه‌ره‌وه‌ بگرێته‌به‌ر، بۆ ئەوەی جارێكی دیكە وڵاتەكە روبەڕوی كارەساتی مرۆیی دیكە نەبێتەوە.


پێشتر لە پارێزگاکانی لازقییە و تەرتوس شەڕ و پێکدادان لە نێوان هێزەکانی حکومەتی نوێ سوریا و لایەنگرانی ڕژێمی پێشوی سوریا رویدا، دوای روداوەكەش ئەحمەد شەرع، سەرۆکی راگوزەری سوریا بڵاویكردەوە كە لیژنەیەکی سەربەخۆیان بۆ لێکۆڵینەوە لە ڕوداوەکانی کەناراوەکانی سوریا پێکهێناوە.