هاوسەرۆکى گشتى دەمپارتى، کوشتنى حەکیم لوقمان، گەنجە کوردەکەى دهۆک لە ئیستەنبوڵى تورکیا شەرمەزار دەکات و دەڵێت: کوردان هەزاران ساڵە لەسەر ئەم خاکە دەژین و هیچ کاتێک خیانەتیان لە هیچ گەلێکى دیکە نەکردوە کە لەگەڵیان لەسەر هەمان خاک دەژین، دەشڵێت: دەبێت کورد لە ئیستەنبوڵ و ئاماد و دێرسیم بە کوردى قسە بکەن.

هەواڵ:KNNC

تونجەر باقرخان، هاوسەرۆکى گشتى پارتی دیموکراسی و یەکسانی گەلان- دەمپارتی لە مەراسیمێکدا لە شارى وان،ى باکورى کوردستان لەبارەى کوشتنى گەنجەکەى شارى دهۆک و هێرشە نەژادپەرستییەکان رایگەیاند؛ دەسەڵاتى تورکیا هێرشەکانیان لە دژى رۆژئاواى کوردستان و هەرێمى کوردستان بەردەوامیی پێدەدات و داوا دەکەین ئەم شەڕ و دەستدرێژییانە کۆتاییان بێت و لە تورکیا تەواوى گەل و نەژادەکان بەیەکەوە بژین.

باقرخان باسى ئەوەشکردوە کە سێ هاوڵاتیی شارى دهۆک لە ئیستەنبوڵ تەنها لەبەر قسەکردنیان لە زمانى کوردى روبەڕوى هێرش بونەتەوە و یەکێک لەو کەسانەش کە گەنجێکە گیانى لەدەستداوە و وتى: بەشێک لە دەسەڵاتدارانى تورکیا شەڕیان دەوێت و بەردەوام دوژمنایەتیی کورد دەکەن، بەڵام کوردان هەزاران ساڵى لەسەر ئەم خاکە دەژین و هیچ جارێک خیانەتیان لەو گەلانە نەکردوە کە لەسەر هەمان خاک لەگەڵیان دەژین.


دەشڵێت: بەداخەوە لە 10 ساڵى رابردودا دەسەڵاتى ئاکەپە و مەهەپە بە ئاشکرا کوردەکان بەئامانج دەگرن و دەبنەهۆى ئەوەى کورد لەلایەن فاشیستەکانەوە بکوژرێن و جەختیش دەکاتەوە کە بۆ کۆتاییهێنان بە زیهنیەتى نەژادپەرستى و فاشیستى داواى ئاشتى دەکەن و دەڵێت:  دەبێت کوردەکان لە ئیستەنبوڵ و ئامەد و دێرسیم بە زمانى خۆیان و بە کوردى قسە بکەن.