بزوتنەوەى گۆڕان، کارنامەى هەڵبژاردنى خولى شەشەمى پەرلەمانى کوردستانى لە هەشت تەوەردا بڵاوکردەوە و هێڵە ستراتیژییەکانى قۆناغى داهاتوى دیارى کردوە.

هەواڵ:KNNC

کارنامەى بزوتنەوەى گۆڕان بۆ هەڵبژاردنى خولى شەشەمى پەرلەمانى کوردستان، هەشت تەوەرى لە خۆگرتوە کە بریتین لە تەوەرەکانى عێراق و هەرێمی کوردستان، ئامانجە نیشتمانی و دیموکراتییەکان، حکومەت و پەرلەمان، تەندروستی و ژینگە، گەنجان، خوێندکاران، ئافرەتان و پرۆژەی ستراتیژی.

بزوتنەوەى گۆڕان لە کارنامەکەیدا، جەخت لە چارەسەرکردنى کێشە هەڵپەسێرراوەکانى نێوان هەرێم و بەغداد لەسەربنەماى دەستور و کارکردن بۆ جێبەجێکردنى تەوتینى موچە و زامنکردنى مافەکانى گەلى کوردستان چارەسەرکردنى کێشەکانى ناوچە جێناکۆکەکان کردوەتەوە.

جەختیش دەکاتەوە لەوەى، پەرلەمان و حکومەتى داهاتو ،کارى لەپێشینەیان دابینکردنى قووت و بژێویى خەڵک و خزمەتگوزارى گشتى و پێداویستییە سەرەکییەکان بێت.

بایەخدان بە گەنجان و ئافرەتان و خوێندکارانیش، بەشێکى دیکەى کارنامەى بزوتنەوەى گۆڕانە بۆ خولى شەشەمى پەرلەمانى کوردستان.

هەروەک جەختیش کراوەتەوە لەوەى، پەرلەمان و حکومەتى داهاتو بەرپرسن لە پیادەکردنى سیستمێکى دیموکراسى و دامەزراندنى دەوڵەتى یاسا، لە کۆتا بەشى کارنامەکەشدا، کە تایبەتە بە پرۆژەى ستراتیژى، بزوتنەوەى گۆڕان پلانێکى درێژخایەنى بۆ گەشەپێدانى سەرجەم بوارەکان خستوەتەڕو.