بەهۆی ئەو بارودۆخەی روی لە ناوچەكە كردوە، هێڵی ئاسمانی قەتەر گەشتەکانی بۆ هەریەك لە عێراق و ئێران و لوبنان تا كاتێكی نادیار رادەگرێت.

هەواڵ: (KNNC)

لە راگەیەندراوێكدا، هێڵی ئاسمانی قەتەر بڵاویكردەوە، بەهۆی ئەو بارودۆخە و پەرەسەندی گرژییەكان لە رۆژهەڵاتی ناوەڕاست، كۆمپانیاكە بڕیاری داوە كە تا كاتێكی نادیار گەشتیەكانی بۆ هەریەك لە عێراق و ئێران و لوبنان رابگرێت، هاوكات بۆ گەشتەكانی ئوردن بڕیاری داوە كە تەنها بەڕۆژدا گەشتەكانی ئەنجام بدات.

دەشڵێت: بەردەوام دەبێت لە چاودێریکردنی دۆخەکە، بڕیارەكەشیان لە گرەنتی كردنی سەلامەتی سەرنشینەکانی سەرچاوەی گرتوە كە هەمیشە لە پێشینەی کارەکانی دەمێنێتەوە.

لەئەنجامی جەنگی نێوان فەلەستین و لوبنان لەگەڵ ئیسرائیل، ژمارەیەک هێڵی ئاسمانی نێودەوڵەتی گەشتەکانیان بۆ بەیروت و تاران ژمارەیەكی دیكەی وڵاتان راگرت، هەروەها هێڵەکانی فڕۆکەوانی کە ئەوروپا بە ڕۆژهەڵاتی ناوەڕاست و باشووری ئاسیا دەبەستنەوە، ناچار بون بۆ دوركەوتنەوە لە گرژییەكان رێگایەکی دورتر بگرنەبەر.