بەپشتبەستن بە یاسای هەڵبژاردن ژمارە (12ـی 2018) میکانیزم بۆ  ئەنجامدانی هەڵبژاردنی ئەنجومەنی نوێنەرانی داهاتو دیاریدەكرێت و وتەبێژی كۆمسیۆنی هەڵبژاردن دەڵێت: دەبێت (45) رۆژ پێش کۆتایی هاتنی خولی پێنجەمی ئەنجومەن هەڵبژاردنەكە بكرێت.


هەواڵ: (KNNC)


جومانە غەلای، وتەبێژی کۆمسیۆنی باڵای سەربەخۆی هەڵبژاردنەكانی عێراق بە(KNN)ـی رایگەیاند: ئامادەكارییەكان بۆ خولی شەشەمی هەڵبژاردنی ئەنجومەنی نوێنەرانی عێراق دەستپێدەكەن و دیاریكردنی كاتی هەڵبژاردنەكەش بەهەماهەنگی لەنێوان ئەنجومەنی وەزیران و كۆمسیۆنی هەڵبژاردنەكان دەبێت.


وتیشی: نابێت هەڵبژاردنی خولی شەشەمی ئەنجومەنی نوێنەرانی عێراق رۆژی (25/11/2025) تێپەڕێنێت.


وتەبێژی کۆمسیۆنی باڵای سەربەخۆی هەڵبژاردنەكانی عێراق جەختیكردەوە، پێویستە لەكاتی خۆیدا و بەبێ دواكەوتن، ئەنجامدانی هەڵبژاردنی بۆ خولی شەشەمی ئەنجومەنی نوێنەران بەڕێوەبچێت و نابێت بكەوێتە  دوای كۆتایی هاتنی خولی پێنجەمی ئەنجومەنەكە.


كەركوك - ئۆژین جۆڵا