سەرۆک کۆمار و سەرۆک وەزیرانی عێراق جەخت دەکەنەوە لە ئەنجامدانی سەرژمێری لە وادەی خۆیدا بە تێپەڕاندن و چارەسەکردنی ئەو بەربەستانەی لەبەردەم ئەنجامدانی پڕۆسەکەدا هەن، بۆئەو مەبەستەش لەگەڵ شاندێکی حکومەتی هەرێم کۆبونەوە.

هەواڵ:KNNC

شاندێکی حکومەتی هەرێمی کوردستان لەبەغداد لەگەڵ سەرۆککۆمار و سەرۆکوەزیرانی عێراق کۆبونەوە، نوسینگەی راگەیاندنی محەمەد شیاع سودانی بڵاویکردوەتەوە، لە کۆبونەوەکەدا پێشهاتەکانی دۆخی ناوچەکە و پەیوەندی نێوان حکومەتی فیدراڵی و حکومەتی هەرێمی کوردستانی عێراق تاوتوێکراون، جەخت کرایەوە لەسەر گرنگی بەردەوامبونی هەوڵەکان بۆ گەیشتن بە چارەسەرکردنی پرسە هەڵپەسێردراوەکان، بە پێی دەستور و یاسا.

هەروەها تاوتوێی ئامادەکارییە بەردەوامەکان کرا، بۆ دەستپێکردنی پرۆسەی سەرژمێری دانیشتوان و پێداچونەوە بە ئامادەکارییەکانی پرۆسەکە، جگە لەوەش گفتوگۆ لەسەر کۆمەڵێک تێبینی پەیوەست بە پرۆسەکەوە کراوە، بە مەبەستی گەیشتن بە لێکتێگەیشتنی ڕاستەقینە و تێپەڕاندنی هەر کۆسپ و بەربەستێک کە دێنە بەردەم پرۆسەکە.

ئاماژەی بەوەشکردوە، لە کۆبونەوەکەدا بە لەبەرچاوگرتنی گرنگی پرۆسەکە باسیان لە تێبینیەکان و چارەسەرکردنیان کردوە کە ڕەنگە ببنەوە هۆی بەربەست بۆ ئەنجامدانی سەرژمێری و سەرجەمیشیان جەختیان کردوەتەوە لە گرنگی ئەنجامدانی سەرژمێریی لە وادەی خۆیدا.