ژمارەی گیان لەدەستدان لە لافاوەکەی ئیسپانیا بەرزبوەتەوە و 150 کەسی تێپەڕاند، ئەوەش بەرزترین ڕێژەی گیان لەدەستدانە لە دوای ساڵی 1973وە کە لەو وڵاتە لە ئەنجامی کارەساتە سروشتییەکان تۆمار کرابێت. 

هەواڵ:KNNC

میدیاکانی ئیسپانیا بڵاویان کردەوە، بەهۆی دروستبونی لافاو لە ناوچەكانی باشور و ڕۆژهەڵاتی وڵاتەكەیان، تەنها لە شاری ڤالنسیا تەرمی 155 کەس دۆزراوەتەوە و لە ناوچەکانی ئەندەلوسیش لافاوەكە زیانی زۆری لێكەوتوەتەوە سێ کەسیش لەو ناوچانە گیانیان لەدەستداوە.

بەپێی زانیاری میدیاکان، ئاماری گیان لەدەستدا بە هۆی لافاوەکەوە گەیشتوەتە 158 کەس و حکومەتی ئیسپانیا دەڵێت، دەیان کەسی دیکە بەهۆی لافاوەکەوە بێسەروشوێنن کە هێشتا دەستی تیمەکانی فریاگوزارییان پێنەگەیشتوە، هەر بۆیە پێشبینی دەکات ژمارەی زیانە گیانییەکان بەرزتر ببێتەوە. 

بەهۆی دروستبونی لافاوەوە، بەدەیان هەزار ماڵ لە باشور و ڕۆژهەڵاتی ئیسپانیا بێبەشبون لە وزەی كارەبا، زیانێکی زۆریش بەر ماڵەکانیان کەوتوە.

لەدوای ساڵی 1973ـەوە یەکەمجارە ژمارەی گیانلەدەستدان بەهۆی باران و لافاوە ئەو ژمارەیە تێپەڕێنێت، لەو ساڵەدا 300 کەس بەهۆی لافاوەوە گیانیان لەدەستدا.