سەرۆکی دەستەی ناوچە کوردستانییەکان رایگەیاند، دەبێت سەرژمێری گشتی دانیشتوان لە کەرکوک و ناوچە کوردستانییەکانی دەرەوەی ئیدارەی هەرێمی کوردستان دوابخرێت.

هەواڵ:KNNC

فەهمی بورهان، سەرۆکی دەستەی ناوچە کوردستانییەکانی دەرەوەی ئیدارەی هەرێمی کوردستان لە کۆنگرەیەکی رۆژنامەوانیدا رایگەیاند، لە ماوەی حەوت ساڵدا حەوت گەڕەکی نوێ بۆ عەرەبەکان لە کەرکوک دروستکراوە و زیاتر لە 600 هەزار عەرەب هێنراونەتە شارەکە و ئەوەش درێژەپێدەری پڕۆسەی تەعریبە.

وتیشی: زیاتر لە 200 هەزار خێزان کەرکوک و ناوچەکانی دیکەی دەرەوەی هەرێم-ـیان بەجێهێشتوە، تورکمانەکانیش هاوشێوەی کورد کێشەیان لەگەڵ سەرژمێری هەیە.

فەهمی بورهان دەڵێت: دەبو سەرژمێری گشتی دانیشتوان لەکاتێکدا ئەنجامبدرایە لانیکەم بەشێک لە بنەماکانی ماددەی 140 جێبەجێبکرایە یاخود، ئەوکات پرۆسەکە ئەنجامبدرایە چونکە، لەروی دەستورییەوە هێشتا دۆخی کەرکوک و ناوچە دابڕێنراوەکان ئاسایی نەبوەتەوە.

داواشی لە ئاوارەکانی شنگال، کەرکوک خانەقین، دوزخورماتو و دبز لەکاتی خۆیدا بگەڕێنەوە ناوچەکانی خۆیان بۆ ئەوەی سەرژمێری بکرێن و کوردانی شاری کەرکوکیش لەرۆژی ئەنجامدانی سەرژمێری گشتی بگەڕێنەوە شارەکەیان.

ئاماژەی بەوەشکرد، ئەگەر سەرژمێری ساڵی 1957 نەکرێتەوە بنەمای سەرژمێری گشتی لە کەرکوک و خانەقین و شنگال نابێت ڕێگە بە ئەنجامدانی سەرژمێری لەو ناوچانە بدرێت، بەوتەی فەهمی بورهان، لە بیستەکانی سەدەی ڕابردوەوە هەر سەرژمێرییەک ئەنجامدرابێت بۆ مەبەستی سیاسیی و بچوککردنەوەی هەرێمی کوردستان بوە.

بڕیارە رۆژانی 16 بۆ 20ی ئەم مانگە سەرژمێری گشتی دانیشتوان لە سەرتاسەری عێراق  بە هەرێمی کوردستانیشەوە بەڕێوەبچێت.