لەلایەن دەزگاى ئاسایشى هەرێمەوە ئەو تۆمەتبارە دەستگیرکرا کە شەوى رابردو لە شارى کۆیە هەڵیکوتایەسەر ماڵى باپیرى و لە دەستڕێژێکى گولـلەدا کوشتى.

هەواڵ:KNNC

دەزگاى ئاسایشى هەرێم رایگەیاند؛ دوای ئەوەی شەوی رابردو لە گەڕەکی زانست لە قەزای کۆیە، بەهۆکاری بونی کێشەیەکی کۆمەڵایەتی هاوڵاتی ( ص، ع، أ ) لە روداوێکی تەقەکردن گیانی لەدەستدا دەستبەجێ ئاسایشى رۆژهەڵاتى هەولێر گەیشتونەتە شوێنى روداوەکە و لێکۆڵینەوەکانیان دەستپێکردوە.

ئاماژە بۆ ئەوەکراوە کە لەماوەیەکى کەمدا توانیویانە تۆمەتبارى روداوەکە کە تەمەنى 22 ساڵە دەستگیر بکەن و لە ئێستادا پەراوى لێکۆڵینەوە لە دادگاى کۆیە کراوەتەوە و لێکۆڵینەوەکان لەگەڵیدا بەردەوامە.

شەوى رابردو، بەهۆى کێشەى کۆمەڵایەتییەوە هاوڵاتییەک هەڵیکوتایەسەر ماڵى باپیرى و لە دەستڕێژێکى گولـلەدا کوشتى و یەکێکى دیکەیشى بریندار کرد، هەر بەهۆى تەقەکردنەکانەوە تەقینى غاز لە ماڵەکەدا رویدا و جگە لە زیانە گیانییەکان بەشێکى ماڵەکەش سوتا.

لەلایەکى دیکەوە پەیامنێرى کەى ئێن ئێن رایگەیاند؛ کەمێک لەمەوبەر لەسەر کێشەى زەوى و زار لە گەڕەکى کەکۆن لە قەزاى کۆیە گەنجێکى 20 ساڵ هەڵیکوتاوەتەسەر ماڵى خاڵى و تەقەى لێکردون.

وتیشى: روداوەکە هیچ زیانێکى گیانى لێنەکەوتوەتەوە.

کۆیە/ دەریا ئەحمەد