سەرۆك وەزیرانی عێراق وتارێكی بەبۆنەی پرۆسەی سەرژمێری گشتی دانیشتوان پێشكەش كرد، داوای لە هاوڵاتیان كرد هاوكاری تیمەكانی سەرژمێری بكەن بۆ سەرخستنی پرۆسەكە.

هەواڵ:KNNC

محەمەد شیاع سودانی، سەرۆک وەزیرانى عێراق لە پەیامێکدا بە بۆنەى دەستپێکردنى قۆناغى سێیەمى سەرژمێرى گشتى، رایگەیاند: پرۆسەی سەرژمێری گشتی ئامرازێكی زانستی نوێیە بۆ پلاندانان بۆ ئایندە و هەنگاوێكی شارستانیە بۆ گەشەپێدان.

وتیشی: سەرژمێری گشتی دانیشتوان هێڵی جیاكەرەوەیە لەنێوان گریمانە و راستییەكان لەپێناو دابەشكردنی سامانی وڵات بەشێوەیەكی دادپەروەر، جەختیشی كردەوە؛ سورن لەسەر خزمەتكردنی گەل بەپێی پرۆگرامێكی زانستیانە و دیاری كردنی خاڵە لاوازەكان و پێشكەشكردنی خزمەتگوزاریی تەندروست بە هاوڵاتییان.

سەرۆك وەزیرانی عێراق داوای لەهاوڵاتییان كرد پابەندی قەدەغەی هاتوچۆن بن و هاوكاری تیمەكانی سەرژمێری بكەن و زانیاری راست پێشكەش بكەن و گوێبیستی بانگەشەكان نەبن.