راوێژکاری کاروباری تەندروستیی سەرۆک وەزیرانی عێراق دەڵێت: حکومەت لەهەوڵی بەنیشتمانیکردنی دەرمان و چارەسەرە پزیشکییەکانە، لەناوەڕاستی ساڵی داهاتوشدا پاکێجێک لە دەرمانی گرنگی خۆماڵی بەدەرمانخانەکان دەگات.

هەواڵ:KNNC

حەمودی لامی رایگەیاند، بۆجاری یەکەم لەعیراقدا 70 جۆر دەرمانی نوێی خۆماڵی تۆمار دەکرێت و حکومەتیش بەردەوامە لەهەوڵەکانی بۆ پرۆژەی بەنیشتمانیکردنی دەرمان و راشیگەیاند؛ زۆربەی بەرهەمەکانی کارگەکانی دەرمانی ناوخۆیی رەوانەی وەزارەتی تەندروستیی دەکرێن و لەناوەڕاستی ساڵی داهاتوشدا پاکێجێکی دەرمانی گرنگى بەرهەمهاتو دەگەیەنرێتە دەرمانخانەکان.

لامی ئاماژەی بەوەکرد، لەشەش مانگی داهاتودا 28 جۆر دەرمانی چارەسەری بەرزبونەوەی پەستانی خوێن و 28 جۆر دەرمانی نەخۆشی شەکرە و 14 جۆر ئەنتی بایۆتیک و چەندان جۆر دەرمانی دیکە بەرهەم دێت.

راوێژکارەکەی سودانی جەختی لەوەشکردوەتەوە، لەچوارچێوەی پرۆژەی بەنیشتمانیکردنی دەرمان کۆمەڵێک رێکار دەگیرێنە بەر لەوانە دابەزاندنی باجی گومرگی لەسەر ئامێر و ماددە خامەکان لە7% بۆ 0.05% و رێگرتن لە هاوردەکردنی دەرمانی ساختە و قاچاخ.