پزیشکێکى پسپۆرى زانستى خۆراک باس لە لایەنە زانستییەکانى نەخواردنى نانى بەیانى دەکات لەدواى تەمەنى 40 ساڵییەوە و جەختیش دەکاتەوە کە نەخواردنى ئەو ژەمە هیچ پەیوەندییەکى بە دابەزاندنى کێشەوە نییە.

تەندروستى:KNNC

د. کامەران ژاژڵەیی، پزیشکى پسپۆڕى زانستى خۆراک دەڵێت: زۆرینەى هاوڵاتییان پرسیارى ئەوە دەکەن کە دواى 40 ساڵ نابێت ژەمى بەیانیان بخورێت بەو پاساوەى لەو تەمەنەدا جەستە لە گەشەکردن دەوەستێت، رونیکردوەتەوە کە گەشەى زۆرینەى مرۆڤ لە 18 ساڵى دەوەستێت و لە کوردستانیش ئەو ژمارەیە بۆ 16 ساڵى کەم بوەتەوە و دەشڵێت: هیچ ناوەندێکى زانستى نییە بڵێت پێویستە واز لە ژەمى بەیانیان بهێنرێت.

ئەو پزیشکە کۆمەڵێک هۆکارى دیکەى خستوەتەڕو کە باس لە گرنگى خواردنى نانى بەیانیان دەکات:

- نەخواردنی ژەمی  بەیانی  بە مەبەستی  دابەزاندنی  کێش  رەنگە  لە  سەرەتادا  سودی  هەبێت،بەڵام  دوای ماوەیەک لە رێجیم هیچ کاریگەریی نییە لە پڕۆسەی دابەزاندنی کێش .

- زۆرینەی پزیشکان و توێژینەوە زانستیەکان کۆکن لە سەر  ئەوەی نەخواردنی ژەمی بەیانی ئەگەری قەڵەوی و  زۆری کێش و بەرگرى ئەنسۆلین و نەخۆشیەکانی دڵ و خوێنبەرەکان و بەرزی چەوریەکانی خوێن زیاد دەکات،ئەوانە ژەمی  بەیانی دەخۆن کەمتر توشدەبن.

-بۆ ئەوانەی بە مەبەستی دابەزاندنی کێش ژەمی بەیانی ناخۆن، زۆرینەی پسپۆڕان پێیان باشە ژەمێکی تر نەخورێت بە تایبەت ژەمی ئێوارە.

- گشتاندن  هەمیشە لە بواری زانستی پزیشکی دا  هەڵەیە، نابێت رێنمایی خۆراک بۆ هەموان وەک یەک بێت، بۆ نمونە کرێکارێک یا جوتیارێک یان قەسابێک کە پێویستدەکات بەیانیان زو بچنەسەر کار و شەوانە زو نوستبێت چۆن بێ  خواردنی ژەمی بەیانی دەتوانێت کارەکەی خۆی راپەڕێنیت، یاخود ئەوانەی نەخۆشی دێژخایەنیان هەیە پێویستە بەیانیان دەرمان دوای خواردن بخۆن.

-  ژەمی بەیانی ژەمێکی سەرەکیە، بەڵام زۆر گرنگە بزانرێت چی دەخورێت و پێکهاتەکانی چییە و بڕی خۆراک چەندە؟ بۆ دابەزاندنی کێش و رێگاگرتن لە قەڵەوی بڕی ئەو خۆراکەی دەخورێت بە درێژایی شەو و رۆژەکە دەخورێت و  جەستە چەندی لێ سەرفدەکات.

-زۆر گرنگە هەمیشە بزانرێت بۆ ژەمی بەیانی ناخۆیت؟ لەوەش گرنگتر ئەوەیە کە ئەگەر  پەیوەندی  بە شەونخونی  و خواردنی  بڕێکی زۆر  خۆراکە لە  ئێوارە و درەنگانی  شەو  ئەو دوو هەڵە رێک  بگرێتەوە .

-  لە رۆژوی زانستیدا  نەخواردنی ژەمی بەیانی خاڵێکی ترە بەس  بە بەردەوامی نییە،  چونکە خۆی ناوی  رۆژوی  پچڕپچڕە  . 

  - پێداویستی خۆراکى  رۆژانەی هەر  تاکێک  جیاوازە  لەوانی تر  و کۆمەڵێک  خاڵ  دەبێتە  هۆی  بنەمای  دیاریکردنی بڕی  خۆراک و جۆر و  پێکهاتوەکانی  .