پێشمەرگە دێرینەکانی بزوتنەوەی گۆڕان لەگەڵ راگەیاندنی پشتیوانی خۆیان بۆ رۆژئاوای كوردستان، داوای یەكڕیزی و یەكهەلوێستی لایەنە سیاسیەكانی رۆژئاوا دەكات و داواش دەكات پەرلەمانی كوردستان حكومەت و لایەنە سیاسیەكانیش پشتیوانی ئەزمونی رۆژئاوای كوردستان بكەن.

هەواڵ: (KNNC)

پێشمەرگە دێرینەکانی بزوتنەوەی گۆڕان لە بەیاننامەیەكدا كە ئەمڕۆ دوشەممە، بڵاویان كردوەتەوە رایدەگەنن: پێشهات و گۆڕانکارییەکان هەلومەرج و دۆخێکى نوێی لە سوریا و ناوچەکە هێناوەتە ئاراوە کە لێکەوتە و کاریگەرى لەسەر گەلەکەمان لە رۆژئاوا و هەرێمى کوردستانیش دەبێت "لەم قۆناغە نوێیە و بۆ پاراستنى ماف و دەستکەوتەکانى میللەتەکەمان لە رۆژئاواى کوردستان، لە سۆنگەى بەرپرسیارێتیەوە وەک پێشمەرگە دێرینەکانى بزوتنەوەى گۆڕان داوا دەکەین لەلایەنەکانى رۆژئاواى کوردستان یەکڕیز و یەک هەڵوێست بن بەرامبەر هەمو ئاڵنگارییەکان لە رۆژئاواى کوردستان".

ئاماژەشیان بۆ ئەوەكردوە، پەرلەمانى هەڵبژێردراوى هەرێمى کوردستان کۆببێتەوە و بە دنیابیینى و هەڵویستى نیشتمانیانەوە مامەڵە لەگەڵ دۆخەکە بکات و پشتیوانى ئەزمونى رۆژئاواى کوردستان بێت، بە زوترین کات کابینەى نوێ پێکبهێنرێت و پابەند بکرێت بە جێبەجێکردنى بڕیار و راسپاردەى پەرلەمان بۆ پشتیوانیکردن لە رۆژئاواى کوردستان.

دەقی بەیاننامەكە:

 بەناوى خواى گەورە و میهرەبان

بەیاننامەی پێشمەرگە دێرینەکانی بزوتنەوەی گۆڕان

پێشهات و گۆڕانکارییەکان هەلومەرج و دۆخێکى نوێی لە سوریا و ناوچەکە هێناوەتە ئاراوە کە لێکەوتە و کاریگەرى لەسەر گەلەکەمان لە رۆژئاوا و هەرێمى کوردستانیش دەبێت.

ئەم دۆخە نوێیە لەکاتێکدایە کە گەلى کورد لە رۆژئاواى کوردستان بە درێژایی حوکمڕانى رابردوى ئەو وڵاتە روبەڕوى ستەم و نادادى بوەتەوە و لە شۆڕشى گەلانى سوریاشدا گەلى کورد بە ئامانجى بەدیهێنانى مافە رەواکانى بەشدارى شۆڕش بوە و ئەزمونێکى سەرکەوتوشى پێشکەش کردوە.

لەم قۆناغە نوێیە و بۆ پاراستنى ماف و دەستکەوتەکانى میللەتەکەمان لە رۆژئاواى کوردستان، لە سۆنگەى بەرپرسیارێتیەوە وەک پێشمەرگە دێرینەکانى بزوتنەوەى گۆڕان داوا دەکەین لەلایەنەکانى رۆژئاواى کوردستان یەکڕیز و یەک هەڵوێست بن بەرامبەر هەمو ئاڵنگارییەکان لە رۆژئاواى کوردستان.

هاوکات داواکارین لە پەرلەمانى هەڵبژێردراوى هەرێمى کوردستان کۆببێتەوە و بە دنیابیینى و هەڵویستى نیشتمانیانەوە مامەڵە لەگەڵ دۆخەکە بکات و پشتیوانى ئەزمونى رۆژئاواى کوردستان بێت، بە زوترین کات کابینەى نوێ پێکبهێنرێت و پابەند بکرێت بە جێبەجێکردنى بڕیار و راسپاردەى پەرلەمان بۆ پشتیوانیکردن لە رۆژئاواى کوردستان.

بەهەمان شێوە داوا لە کۆمەڵەى پێشمەرگە دێرینەکانى کوردستان و هەمو ئەندامانى دەکەین کە پێکەوە هەمو پێشمەرگە و دڵسۆزانى کورد یەک دەنگ و یەکڕیز و یەک هەڵوێست بین بۆ پشتیوانى رۆژئاواى کوردستان.

هیواى سەرکەوتن بۆ خەباتى رەواى گەلى کورد لە رۆژئاواى کوردستان دەخوازین..

پێشمەرگە دێرینەکانى بزوتنەوەى گۆڕان

٢٣ى١٢ى٢٠٢٤