رێکخەری گشتیی بزوتنەوەی گۆڕان لە شارى سلێمانى سەردانی کڵێسای کریستیانەکانی کرد و بەشداری لە مەراسیمەکانی یادی لەدایکبونی حەزرەتی مەسیحدا کرد، داواش دەکات حیزبەکانى هەرێمى کوردستان پەلە بکەن لە کاراکردنى پەرلەمان و پێکهێنانى حکومەتى نوێ.

هەواڵ:KNNC

ئەمڕۆ دانا ئەحمەد مەجید، رێکخەری گشتیی بزوتنەوەی گۆڕان، بە یاوەری شاندێکی بزوتنەوەکە، بە مەبەستی پیرۆزباییکردن لە یادی لەدایکبونی حەزرەتی مەسیح، سەردانی کڵێسای مار یوسفییان کرد لە سلێمانی و لەلایەن قەشە ئەیمەن عەزیز پێشوازییان لێکرا.

وێرایی پیرۆزبایی لە کریستییانەکان رێکخەری گشتیی بزوتنەوەى گۆڕان لە کۆنگرەیەکی رۆژنامەوانیدا رایگەیاند: هیوادارن ساڵی داهاتو ببێتە ساڵی پێکەوەیی و سەقامگیریی بۆ ناوچەکە، یەکگرتویی کوردی بۆ دۆخی ئێستای هەرێمى کوردستان و رۆژئاواى کوردستانیش بە گرنگ وەسف کرد.

داواى کرد لایەنە سیاسییەکانى هەرێمى کوردستان پەلە بکەن لە کاراکردنى پەرلەمان و پێکهێنانى حکومەتى نوێ، لەبارەى پرسى رۆژئاواى کوردستانیشەوە وتى:  دەبێت هەمو حیزبەکانى رۆژئاواى کوردستان لەپێناو بەرگریکردن لە یەکتر رێککەوتن بکەن.

فۆتۆ/ رەهێڵ جەمال