لە چوارچێوەی گەڕاندنەوەی ئاوارەكانی ناوخۆ و دەرەوەی وڵات، عێراق چوار هەزار و (500) كۆچبەری لە  سنورەكانی نێوان پۆڵەندا، لیتوانیا و بیلاڕوسیا گەڕاندەوە و بریكاری وەزارەتی كۆچیش دەڵێت: كۆچبەكانی ئەوروپا لە دۆخێكی ناهەمواری سەختی مرۆیدا ژیانیان بەسەر بردوە.

هەواڵ: (KNNC)

كەریم نوری، بریكاری وەزارەتی كۆچ و كۆچبەرانی عێراق رایگەیاند: گەڕاندنەوەی ئاوارەكانی ناوخۆی وڵات و كۆچبەرەكانی دەرەوە، لەسەر خواست و خۆبەخشانەی خۆیانە، نەك لەلایەن حكومەتەوە فشار بخرێتە سەریان.

وتیشی: پێشتر (170) كامپ بۆ ئاوارە ناوخۆییەكان لە عێراق و هەرێمی كوردستان كرابونەوە، بەڵام ئێستا ژمارەكەیان بۆ (22)  كامپ دابەزیوە كە (16) كامپیان لە پارێزگای دهۆكە و شەشەكەی دیكەیان لە پارێزگای هەولێرە، بەڵام كامپەكانی پارێزگای سلێمانی بەتەواوی داخراون.

رونیكردەوە، ژمارەی ئەو خێزانانەی لە ئەو (22) كەمپە دەژین لە (18) هەزار خێزان پێكهاتون كە زۆربەیان خەڵكی شنگالن و تا ئیستا نەگەڕاونەتەوە بۆ شوێن و ناوچەكانی خۆیان.

بریكاری وەزارەتی كۆچ و كۆچبەرانی عێراق ئاماژەی بۆ ئەوەشكرد، سەركەوتوبون لە گەڕاندنەوەی چوار هەزار و (500) هاوڵاتی بۆ خاكی وڵات كە لە سنورەكانی نێوان پۆڵەندا، لیتوانیا و بیلاڕوسیا كە لە دۆخێكی ناهەمواری سەختی مرۆییدا ژیانیان بەسەر بردوە.