وەک پێشتر باسى لێوەکرد، سەرۆکى ئەمەریکا بڕیارى دەرکردنى هاوڕەگەزخوازان و رەگەزگۆڕاوەکانى ناو سوپاى ئەمەریکاى خستە بوارى جێبەجێکردنەوە و بەپێی بڕیارەکە لەمەودوا هیچ کەسێک رێگەى پێنادرێت نەشتەرگەریی گۆڕینى رەگەز بگات یاخود خۆى وەک رەگەزى بەرامبەر بناسێنێت.

هەواڵ:KNNC

بەپێی ئەو بڕیارەى دۆناڵد ترەمپ، وەک سەرۆکى ئەمەریکا و فەرماندەى گشتى هێزە چەکدارەکان دەریکردوە دەڵێت:  سوپاى ئەمەریکا وەک بەهێزترین سوپاى جیهان ئەرکى پاراستنى تاکى ئەمەریکى و وڵاتەکەیە  و ئەمەش پێویستى بە تاکى بەهێز و کاریگەر هەیە و نابێت رێگە بدرێت بەهۆى کۆمەڵێک ئەجێنداى سیاسی و تایبەتەوە مەرجەکان بۆ سەرباز شل بکرێتەوە و کاریگەریی لەسەر یەکگرتویی یەکەکان دروست بکات.

بەپێی بڕیارەکە کە کۆشکى سپى بڵاویکردوەتەوە هاتوە کگە ؛"لەم دواییانەدا هێزە چەکدارەکانمان تێکەڵى چەند ئەجێندایەکى رەگەزى کراون و بەشێک لە سەربازەکان لە حاڵەتى بونى کێشەى دەرونى و کاتێکى زیاتریان بۆ چارەسەر پێدەدرێت و بەشێکیان پێویستیان بە مانەوە لە نەخۆشخانەکان هەیە کە ئەمەش لەگەڵ چالاکى و ئەرکەکانیان ناگونجێت".

جەخت کراوەتەوە کە گۆڕینى رەگەز پیاو بۆ ژن و هەبونى رەگەزە ساختە ناتوانێت ستانداردەکانى ئەرکى سەربازیی جێبەجێ بکات و دەبێت سەرباز پابەند بێت بە ژیانێکى رێزدار و راستگۆ و لەبەر شکۆى وڵاتەکەمان دەبێت ئەو کەسانەى وەک سەرباز خزمەت دەکەن لەروى دەرونى و جەستەییەوە شیاو بن و دوربن لە چارەسەرە دەرونى و جەستەییەکان.

هەر بۆیە بڕیاردراوە کە لەمەودوا رێگە نادرێت بە نەشتەرگەریی گۆڕینى رەگەزى و ئەو کەسانەش توشى ناڕێکى رەگەزى بون لەناو سوپاى ئەمەریکا رەت دەکرێنەوە و فەرمانیش کراوە لەماوەى 60 رۆژدا وەزارەتى بەرگرى ئەمەریکا کار لەسەر رێکخستنەوەى ستاندارتە پزیشکییەکان بکات بۆ وەرگرتن و دانان و مانەوەى سەرباز لە سوپاى وڵاتەکە.


جەختیش کراوەتەوە کە وەزارەتى بەرگرى ئەمەریکا بە هەمو جۆێک دەبێت ناوهێنانە جیاوازەکان بۆ ناساندى رەگەزى رابگرێت و تەنها نێر و مێ بەکاربێت و لەناو سوپاشدا رێگە بە پیاوان نادرێت دەستشۆرى ژنان بکاربهێنن و رێگەش نادات ژنان دەستشۆر و کەلوپەلە تایبەتەکانیان لەگەڵ سەربازى پیاوەکان بەش بکەن.