ئیدارەی نوێی سوریا داوای رادەستكردنەوەی سەرۆكی هەڵاتوی سوریا و یاریدەدەر و نزیكەكانی لە روسیا دەكات.


هەواڵ: (KNNC)


سەرچاوەیەک لە ئیدارەی نوێی سوریا ئاشكرایكردوە، لە كۆبونەوەی دوێنێ سێشەممە (2024/1/28) سەرۆكی ئیدارەی نوێی ئەو وڵاتە لەگەڵ شاندە باڵاكەی مۆسکۆ، ئەحمەد شەرع داوای كردوە كە بەشار ئەسەد، سەرۆكی هەڵاتو و یاریدەدەركانی و نزیكەكانی كە لەرۆژی (8ـی كانونی دوەمی 2024) رویان لە روسیا كردوە  رادەستی دیمەشق بكەنەوە.

میدیاكانی جیهان ئاماژەیان بۆ ئەوەكردوە، یەكەم شاندی باڵای روسیا سەردانی سوریایان كرد و دوای كۆتایی هاتنی كۆبونەوەكەیان لەگەڵ بەرپرسانی باڵای دیمەشق، شاندە روسییەكە ئامادەنەبون لێدوان بۆ رۆژنامەنوسان لەسەر هیچ یەكێك لە تەوەرەكانی كۆبونەوەكەی بدەن.

ئەمڕۆ چوارشەممە، دیمیتری پێسکۆڤ، وتەبێژی كۆشكی كرملین رایگەیاند: روسیا کار لەسەر بنیاتنانی دیالۆگ لەگەڵ ئیدارەی نوێ لە سوریا دەکات، هەروەها  مۆسکۆ هەوڵدەدات داهاتوی دو بنکەی سەربازیەكەی لە ئەو وڵاتە یەكلایی بكاتەوە.