وەزارەتی کشتوکاڵی عێراق رایدەگەیەنێت: لەنێوان ساڵانی (2023 و 2024) زیاتر لە (13) هەزار سیستەمی ئاودێری مۆدێرنی بەسەر جوتیاراندا دابەشكردوە كە سودی بۆ یەك ملیۆن (500) هەزار دۆنم زەوی هەیە.


هەواڵ: (KNNC)


مەهدی سەحەر، یاریدەدەری وەزیری كشتوكاڵی عێراق رایگەیاند: پێشتر وەزارەتەكەی پلانی بۆ چارەسەری كێشەی كەمئاوی و پشتگیری كردنی كەرتی كشتوكاڵ و پێشكەشكردنی هاوكاری بە جوتیارانی وڵات داڕشتوە، لەسەر ئەو بنەمایە و بەتەرخانكردنی زیاتر لە (800) ملیار دینار بۆ كڕین و دابینكردنی كەناڵی سیستەمی ئاودێری هاوچەرخ دیاریكردوە و توانراوە لە نێوان ساڵەكانی (2023 و 2024) زیاتر لە (13) هەزار سیستەم بەسەر جوتیاراندا دابەشبكرێت.


وتیشی: سیستەمە هاوچەرخەكانی ئاودێری بەسەر جوتیارانی ناوچە جیاجیاكانی وڵاتدا دابەشكراوە كە سود بە نزیكەی یەك ملیۆن و (500) هەزار دۆنم زەوی دەگەیەنێت، بەمەش بەفیڕۆچونی ئاو و كەم دەبێتەوە، هەروەها كەمترین بڕە ئاو بۆ زۆرترین بڕی بەروبومە كشتوكاڵییەكان بەكاردەهێنرێت.


یاریدەدەری وەزیری كشتوكاڵی ئاماژەی بۆئەوەشكرد، بەهۆی ئەو پشتیوانیانەی حكومەت پێشكەشی كەرتی كشتوكاڵ و جوتیارانی كردوە، عێراق دو وەرزی کشتوکاڵییە توانیویەتی بگاتە ئاستی خۆبژێوی، كە ئەو سەركەوتنەش بەشێكی گەورەی بۆ دابەشكردنی سیستەمی ئاودێری و تەكنەلۆژیای سەردەم دەگەڕێتەوە.