وەزیرى دەرەوەى میسر ئاشکرایدەکات؛ دیدگایەکى رونیان هەیە بۆ دوبارە بنیاتنانەوەى غەززە بێ ئەوەی پێویست بکات هیچ هاوڵاتییەک خاکى وڵاتەکە جێبهێڵێت.

هەواڵ:KNNC

عەبد عاتى، وەزیرى دەرەوەى میسر لە کۆنگرەیەکى رۆژنامەوانییدا رایگەیاند؛ دیدگایەکى رونیان هەیە بۆ دوبارە بنیاتنانەوەى غەززە و بۆ ئەو کارەش رێککەوتنى عەرەبیان هەیە و لەو چوارچێوەیەدا گفتوگۆ لەگەڵ نەتەوەیەکگرتوەکان دەکەن.

ئەوەشى خستوەتەڕو کە ئەمە هەنگاوى یەکەمە و دەبێتەهۆى دروستبونى پرۆسەیەکى سیاسى راستگۆیانە و پێویستیشە لەسەر فەڵەستین رێگە نەدات گرژییەکان پەرە بسەنن و ئەوەش تاکە رێگەیە بۆ بەدیهێنانى ئاسایش و سەقامگیریی لە ناوچەکە.

داواشى کردوە کە پەلە بکرێت لە جێبەجێکردنى ئەو پرۆژانەى کە غەززە دوبارە بنیاتدەنێتەوە بەتایبەت لە کەرتى تەندروستى و وتى: میسر بە هەماهەنگى لەگەڵ نەتەوەیەکگرتوەکان لە هەوڵدایە.

ئەوەش لەکاتێکدایە پێشتر دۆناڵد ترەمپ، سەرۆکى ئەمەریکا رایگەیاند؛ غەززە بەتەواوەتى وێران بە و پێویستە بەمەبەستى دوبارە بنیاتنانەوە وڵاتانى دراوسێ و وڵاتە عەرەبییەکان پێشوازى لە فەڵەستینییەکان بکەن و پێشنیازى کرد ناوچەکە چۆڵ بکرێت.