وەزیری پلاندانانی عێراق ڕایگەیاند، لە 24ی ئەم مانگە ئەنجامی کۆتایى سەرژمێری گشتی ڕادەگەیەنرێت وتیشی: بەپێی داتاکان ڕێژەی هەژاری لە عێراق کەمی کردوە.

هەواڵ: KNNC

محەمەد تەمیم، وەزیری پلاندانانی عێراق رایگەیاند، کە ڕۆژی 24ی شوبات ئەنجامی کۆتایى سەرژمێری گشتی لە عێراق و هەرێمی کوردستان ڕادەگەیەنرێت.

ئاشکراشیکرد، بەپێی ئەنجامی سەرژمێریەکە ڕێژەی هەژاری گەیشتوەتە 17.5%  ئەمەش بەراورد بە پێشوتر کەمی کردوە و بەرزترین ڕێژەی هەژاری لە پارێزگای موسەنا بوە کە 40% ە.

وەزیری پلاندانان باسی لەو گۆڕانکاریەش کردوە کە دواى سەرژمێرى بەسەر بودجەى پارێزگاکاندا دێت و لەوبارەیەوە رایگەیاندوە، ئەو پارەیەى لە بودجەی ساڵانەى پارێزگاکان دەمێنێتەوە لەناو سندوقی پارێزگاکە دەبێت و ناگەڕێتەوە بۆ وەزارەتی دارایی.

لە 20ی مانگی تشرینی دوەمی ساڵی رابردو سەرژمێری گشتی لە عێراق و هەرێمی کوردستان ئەنجامدرا، بەپێی ئەنجامەکان ژمارەی دانیشتوانى عێراق 46 ملیۆن 122 هەزار کەس.