لەناو هەزاران پشتیوان و دوای (15) رۆژ لە نان نەخواردن و مانگرتن بۆ جێبەجێ كردنی داواكارییەكانی موچەخۆران، دروشمی سەرەكی پشتیوانانی ئەمڕۆی مامۆستایان شكاندنی مانگرتنبو، بۆیە مامۆستایانی مانگرتو بڕیاری هەڵپەساردنی مانگرتنەكەیان دا.

هەواڵ: (KNNC)

لەوبارەیەو مامۆستا هادی ڕەشید، یەكێكی لە مامۆستایانی مانگرتو بەناوی (13) مامۆستا مانگرتوەكەی دیكە وتارێكی خوێندەوە كە لە بەشێكیدا هاتبو؛ بۆ بەدەستهێنانەوەی مافی مامۆستایان و موچەخۆرانی هەرێم لە پلەبەرزكردنەوە و جێبەجیكردنی پڕۆسەی تەوتین، مامۆستایانی مانگرتو خەباتی مەدەنییان گرتەبەر، بەڵام دەسەڵاتدارانی هەرێمی كوردستان نە بینیان و نە ویستیشیان بو گوێیان لێبگرن.

وتیشی: سوپاسی هەمو ئەو كەسانە دەكەن كە پشتیوانیان لە مامۆستایانی مانگرتو كردوە، هەروەك سوپاس بۆ كارمەندەكانی تەندروستی كە هەمیشە چاودێری مامۆستایانی مانگرتویان كردوە لەگەڵ پەیامنێر و كەناڵەكانی راگەیاندن دەكەن كە دەنگی مامۆستایان و هەمو ئەو كەسانەی پشتیوانی مامۆستایانیان كردوە بەگوێی جیهاندا گەیاندوە.

رونیكردەوە، له‌ ژێر فشاری هیچ لایه‌نێكدا مانگرتن ناشكێنن، به‌ڵكو لەبەر حورمەتی قورئانی پیرۆز و له‌سه‌ر داوای هاوڵاتیان، مامۆستایانی مانگرتو بڕیاره‌كه‌یان داوه‌.

ئاماژەی بۆ ئەوەشكرد، سەرباری ئەوەی لەلایەن چەند لایەنێكی سیاسییەوە تەخوێن كراون،  بەهۆی چەند كەسێكەوە پرۆسەی سیاسی لە هەرێمی كوردستان پەكی كەوتوە.